X

تجربه محاكمه تخلف تجنيد بعد الكشف الطبي 2019

Collapse
  • تصفية
  • الوقت
  • عرض
مسح الكل
مشاركات جديدة
  • عضو مُشارك
    • Jun 2019
    • 2

    السلام عليكم
    حبيت اشارك بتجربه انهاء اجرائات التخلف عن التجنيد بعد الكشف الطبي منطقه إسكندريه

    الحاله بتاعتي اني عملت الكشف الطبي وسمعت الارجاء في 2017 ومرحتش بعد كده يوم الترحيل وتخلفت لحد ما تميت الثلاثين وقدمت للمحاكمه بعد شهر واحد من عيد ميلادي

    اول نقطه عشان قدمت ورقي وراح للسلاح بتاعي تم ابلاغ الشرطه المدنيه وبعتوا حد للبيت بعد معاد الترحيل باسبوع بس ملقوش حد ومبعتوش حد تاني بس طبعا لو كان اتكشف علي بطاقتي طول الفتره دي كنت هترحل تجنيد فوري
    المهم محدش كشف عليا طول السنتين وبعد ما عديت التلاتين بدأت في الاجرائات

    اول حاجه الفيش والتشبيه.. رحت اطلعه من مصلحه الاحوال المدنيه في العباسيه
    وعند استلامه قالولي مسجل عليا قضيه او مطلوب القبض عليا ولازم استني تلات ايام
    ​​​لانه بيكون متسجل هارب من التجنيد
    بعد تلات ايام رحت استلم الفيش ولقيت مفيش حاجه مكتوبه فسألت قالي احنا في التلات ايام بنكلم الجهه المسئوله ومبلغه عنك وعشان انت مقدم الفيش للتجنيد وعديت التلاتين بتتشال من عليك

    بعد كده رحت منطقه تجنيد اسكندريه والمطلوب الفيش وشهاده ميلاد وبطاقه ساريه واربع صور من كل حاجه

    دخلت فكشف بالرقم الثلاثي من شهاده الميلاد وقالي اني مسجل عنده هروب مش تخلف
    فقلتله اني عملت الكشف الطبي ومكملتش
    قعد يقولي متأكد انك مرحتش قلتله متأكد
    فقالي وانا هعرف منين ايه اللي يثبتلي
    قلتله معايا ال110 جند ومستلمتش حاجه بعد كده
    مخدش مني اي اوراق او حتي اسمي وطلب مني نمره تليفوني بس وقالي هنتصل بيك لو متصلناش تعالي بعد شهر
    محدش اتصل بيا ورحت بعد شهر
    فدخلت قلت اللي حصل من شهر كان موظف تاني
    فقالي استني بقي نشوف ملفك فين انت عندي مجند
    قلتله انا معرفش حتي سلاحي قالي سلاحك سلاح اشاره وملفك ممكن يجي بعد يوم ولا شهر منعرفش بقي واخد بطاقتي وقالي استني
    فانا قلت ساعتها يبقي الراجل اللي فات اللي اخد نمرتي معملش اي اجرائات وهستني شهر تاني
    المهم بعد ربع ساعه قالي اروح اجيب ملف تخلف تجنيد ب50جنيه ونص
    بعد طابور ساعتين رجعتله اخد مني اصل الورق وقالي استني تاني
    ربع ساعه وقالي هات الصور بتاعت الورق واستني
    بعد ربع ساعه كمان لقيت العسكري في الشباك اللي جنبه بيناديني يبصمني واداني ورقه اروح للنيابه العسكريه بعديها بتلات ايام

    هنا عايز اوضح نقطه الاجرائات اتغيرت من شهر تقريبا
    كان قبل كده بيقولك ساعتها معاد المحاكمه المره دي النظام اتغير وبيبعتني للنيابه العسكريه في فلمنج اخد معاد المحاكمه

    معاد النيابه العسكريه كان بعديها باربع ايام
    رحت وقفونا ساعتين وبعد كده فتحوا دخلنا محدش سأل علي حاجه بنمضي اسمنا وبنبصم وبناخد ورقه فيها معاد المحاكمه بعديها بتلات ايام

    يوم المحاكمه كان النهارده. دخلنا المحكمه كنا 20 واحد تخلف تجنيد واتنين تخلف استدعاء
    استنينا تلات ساعات بعد كده القاضي دخل
    نادي علي واحد واحد سأل مجتش ليه
    كان كله بيقول ظروف شخصيه ظروف سفر كده يعني وبيسأل بتشتغل ايه وبعد كده قعدنا
    خلصنا في ربع ساعه وبعد كده القاضي قال كل واحد عليه غرامه كام
    كلنا كان الغرامات 8100 و8200 و8300 بشكل عشوائي مفرقش قلنا ايه اساسا
    باستثناء واحد عنده صمم في اذن والتانيه السمع ضعيف جدا وكان معاه والدته وزوجته في المحاكمه ده اداله 3000 جنيه مع ايقاف تنفيذ يعني حتي مش هيدفع حاجه
    الاتنين الاستدعاء اداهم سنه سجن مع ايقاف التنفيذ وغرامه الف جنيه
    المفروض هنروح بعديها باربع ايام النيابه العسكريه مره تانيه ناخد ايصال ونروح ندفع الفلوس في منطقه سموحه وبعد كده نرجع بعديها بيوم للنيابه مره تانيه بايصال الدفع وناخد تصديق الحكم وبعديها نروح منطقه التجنيد لشهاده الاعفاء

    ده مختلف شويه عن قبل كده كان قبل كده لازم تدفع في نفس اليوم وتصديق الحكم بياخد 15 يوم. دلوقت الدنيا اختلفت وبيخلص بمشاوير اكتر بس في وقت اسرع

    الحاجه الاخيره ان دلوقت وانت بتطلع شهاده الاعفاء لازم كمان تدفع فلوس الشهاده الجديده الكارنيه هتستلم الشهاده الورقيه في نفس اليوم والكارنيه بعد 15 يوم ومينفعش تقول عايز الورقيه بس لازم تدفع الاتنين

    نصيحه لاي حد هتسمع اشاعات كتير عن زياده الغرامه عن 10 الاف وهتسمع كلام اكتر لو رحت الكشف الطبي ومكلمتش وناس هتقول هتتحاكم هروب او هيحكم بالسجن.. متسمعش اي كلام ومتاخدش محامي
    ده قانون ومش هيتغير غير بقانون وطالما مفيش تعديل علي القانون بزياده غرامه او غيره متسمعش كلام حد ومالوش اي لازمه تروح بهدوم مقطعه او تحور علي القاضي وتكدب كده كده كله في الغرامه زي بعض
    ولو باديك تقضي تجنيدك ومعندكش ظروف تمنع روح تجنيدك ده شرف وواجب وطني ولولا الظروف بتبقي صعبه والتزامات عائليه كنا قضينا جيشنا
    الحمد لله علي كل حال واللي عنده اسئله يتفضل
    Link
  • عضو مُشارك
    • Nov 2018
    • 17

    #2
    ناس كتير كانت بتسأل عن حالة الهروب بعد الكشف الطبى فانت شرحتلهم الحل بكل التفاصيل.. جزاك الله كل خير
  • عضو مُشارك
    • Jun 2019
    • 2

    #3
    هكمل باقي الاجرائات هنا بعد ما خلصت واخدت الشهاده

    كان فاضل المفروض اروح ادفع الغرامه بس لما رحت كان اجازه رسميه 30/6 وقالولي اجي يوم تاني فرحت اخدوا البطايق وخلونا نكتب ورقه فيها يوم المحاكمه والغرامه وبعتونا لحته تانيه ندفع فيها.. لازم الفلوس تبقي كلها فئه واحده يأما 200 يأما 100 وطبعا كل مشوار بتستني فيه اربع خمس ساعات انتظار
    بعديها اخدنا وصل احمر وقالولنا نروح تاني النيابه بعد 15 يوم
    احنا رحنا بعد اربع ايام بس.. اخدوا مننا البطايق برضه وبعد اربع خمس ساعات انتظار اخدوا مننا 50 جنيه وادونا ورقه فيها صيغه تصديق الحكم
    رحت التجنيد بعديها باربع ايام تاني طلبوا اصور كل ده تلات نسخ مع صوره البطاقه واجيب بون تجنيد ب65 جنيه فيه ورقه صفرا بنملي فيها الجزء اللي فوق اسمنا والرقم الثلاثي وكده
    وقعدونا في المظله اربع خمس ساعات بعد كده ابتدي ينادي علينا نختم الوصل ونروك ندفع تاني بون الكارنيه الجديد ب60 جنيه ونروح نتصور وبعد التصوير اخدنا شهاده تخلف تجنيد وايصال للكارنيه نستلمه بعديها ب 15 يوم بس كده
  • مشرف عام
    • Nov 2018
    • 1361

    #4
    بارك الله فيك اخى
    انا عملتها تخلف تجنيد دفعت ٨١٠٠ جنية دة حد ادنى دة لسن ال٣٠ لحد ٣٥ سنة اما من ٣٥ لحد ٤٥ تدفع ٤ الاف جنية بعد كدة ب ١٠٠ جنية غرامة دة كلام صول هنا بالمحكمة بس ماشاء الله انا كان معايا تقريبا ٣٠ واحد وكان القاضى عسل خلى كلة ٨١٠٠ جنية ربنا يباركلة

Working...
X