العودة   منتديات داماس > المنتديات العامة > المنتدى العام



إضافة رد
12-07-2018, 10:47 AM
ahmed 12 salah
الوسـام الذهبي
رقم العضوية: 700352
تاريخ التسجيل: Dec 2015
الإقامة: >> ( Egypt ) <<
المشاركات: 1,676
تلقى دعوات الى: 793 موضوع
إعجاب: 1,305
تلقى 1,126 إعجاب على 521 مشاركة
 
انا بحبك ايييه بحبك بتحبني باماره اييه "واقع نعيشه "


واقع وليس" قصه " بقلم الصديق " خالد سامي "

انا بحبك ايييه بحبك بتحبني باماره اييه "واقع نعيشه "



أنا بحبك !

بتحبني ، بتحبني بأماره إيه ؟! بأماره سمعتي الي زي الزفت بسببك ، فاكر يا خالد !

فاكر لما جيت وقولتلك بابا سمعني وانا بكلمك في التليفون

ساعتها انا كنت نسيت اقفل الباب وكان مردود

دخل فتح الباب بص لي ، فضل باصص لي

كأنه مش مصدق إني أعمل فيه كدا !! كأنه حاسس إنه بيحلم وعاوز يفوق ، فضلت متنحه وعيني في عينه

شوفت الكسره في عينه ، شوفت الدموع وهي بتتجمع وهو مانعها تنزل

ساعتها ، قالي كلمه واحده ! قالي ليه ؟! ليه تعملي فيا كدا ؟! ليه تخوني ثقتي فيكِ وتكسريني بالشكل دا ، عملت انا

فيكِي إيه يابنتي ! عشان أقابل منك كدا ؟!



دا أنا طول الوقت شقيان وطالع عيني عشان أخليكم أحسن ناس ! هو دا جزائي منك يامنه ؟!

دا انا عمري ماسألتك رايحه فين ولا جايه منين ، من كتر ما أنا بثق فيكِي ، كنت بقول أنا مخلفتش بنات ، عشان البنت الي عندي ب ١٠٠ راجل !!

الله يسامحك يامنه ، بس أنا مش مسامح ومشي !

مشي بعد ماظهرلي نفسي علي حقيقتها وإني فعلا حقيره اووي ، مشي وانا مش عارفه هرفع عيني في عينه تاني إزاي ؟!

فاكر يا خالد ساعتها وانا بحكيلك ومنهاره من العياط كان رد فعلك إيه ؟!

قولتلي معلش :)

ولا بأماره إنك لما عرفت إن أختك بتكلم زميلها في الجامعه ، كنت هتتجنن وقعدت تشتم وتتعصب وقولت والله لاذبحها واذبحه ، خانتني في عرضي وشرفي !


طب وانا يا خالد ، أنا مش عرضك وشرفك ؟!


لا صح ؟! عشان كدا ، أنا عاادي أكلمك وعادي نخرج وعادي تمسك إيدي وعادي وعادي ! عشان انا ولا عرضك ولا شرفك

انا واحده سهله رخيصه بتقضي معاها يومين ويوم لما تيجي تتجوز ، هتقولي ربنا يعوضك بالأحسن والحكايه خلصت !

أقولك بتحبني بأماره إيه تاني !!

بأماره إني كنت عفيفه عمري ماكلمت حد ولا عمري صاحبت ولا عمري عرفت القرف الي بعمله دا
كنت من البنات النقيه الي صاينه كل مشاعر الحب لزوجها
مستنيه أول كلمه بحبك تطلع مني تبقي لزوجي !

بس إنت فضلت ورايا مصمم أقفل باب تفتح إنت باب تاني
أصدك تزن أكتر ، لحد ماوقعت

لحد مابقيت أتكسف حتي أدعي ربنا ، فاكر لما قولتلك انا عاوزة أتوب وأبعد عنك ، قعدت تضحك وتهزر وكأني بقول نكته

طب أنا لو مت وإنت بتكلمني ، إنت هتنفعني ؟! هتيجي تقعد معايا في القبر شويه ، ولا هتروح لربنا تقوله يارب هي مالهاش دعوه انا الي غويتها وتشيل عني عذاب جهنم

يامنه ....

لا سيبني بقا انا الي أتكلم ، انا علي طول ساكته وإنت الي بتتكلم

انت محبتنيش ، إنت حبيت اهتمامي ، حبيت خوفي عليك

حبيت سيطرتك وفرض رجولتك وماتنزليش ومتروحيش وبتاع

انا همشي يا خالد ، انا مش عاوزه اشوفك ولا حتي صدفه

سيبني الحق أصلح أي حاجه من الي باظت

سيبني أتلم علي روحي تاني يا خالد ، سيبني أرجع نقيه وعفيفه كما كنت ، متحاولش تتواصل معايا بأي شكل ، انا المره دي هثبت لبابا فعلا إنه خلف بنت ب ١٠٠ راجل

مشيت ، مشيت وانا حسه إني رجعت ولو جزء من كرامتي الي إتمسح بيها الأرض ، مشيت وانا بقول
صفحه جديده يارب ، عهد جديد يارب ، أعني يارب ، سدد خطايا يارب

روحت البيت ، لقيت بابا قاعد علي الكرسي ، اول ما شافني قام بسرعه ودخل الاوضه ، ناديت عليه مردش ،خبط ودخلت ، بابا !

واقف مديني ظهره وباصص في الشباك

ناديت تاني ، بابا ! انا منه !

منه بنتك يابابا ، للدرجه دي كرهتني ، للدرجه دي مبقيتش قادر تبص في وشي ، للدرجه دي انا بقيت وحشه في نظرك


انا وحشه يابابا انا عارفه ، بس مش انت كنت دايما تقولي إغلطي وإتعلمي من غلطك ، أمال إنتِي عايشه ليه !
طب أنا غلطت ، وإتعلمت ، إتكسرت ااه وبوظت كل العلاقه الي مابيني وبينك بس إتعلمت ، أنا هصلح كل حاجه
كل حاجه هترجع زي ماهي ، اوعدك ❤

بس أنا محتاجه حضنك دلوقتي جدا ..

محتاجه اسمعك ، زعق إضربني ، إعمل اي حاجه بس بلاش كدا عشان خاطري
يابابا ؟!

إدورت عشان أمشي لما يأئست من إنه يرد ، لما وصلت للباب
سمعته ، سمعته بيقول يامنه !

يااه كانت احلي منه سمعتها ، رجعت جري في حضنه ، بوست إيده ودماغه وأنا عماله اعيط
اخدني وضمني 💙


قالي خلاص مش مهم أي حاجه فاتت ، طالما بتتنفسي يبقي لسه فيه أمل ، فيه أمل تتغيري وتغيري كل حاجه
تحولي الموقف كله لصالحك ، تثبتيلي إنك فعلا منه الي ب ١٠٠ راجل

حكيتله علي الي حصل مع خالد

بص في عيني

قالي بتحبيه ؟!

سكيت ، ودمعتي نزلت 💔 عرف من عيني الجواب


فسكت شويه وقالي " من ترك شيئا لله عوضه الله خيرا منه "


حطي دي في ودانك وبس يامنه

قومي يلا حبيبتي اتوضي وصلي ركعتين توبه ، عقبال ما ادخل احضر مع مامتك الغدا وحشني القعده معاكِ علي الأكل

قومت ، اتوضيت وصليت ، كسرت الشريحه

دخلت عملت بلوك لكل حاجه

عهد جديد معاك يارب

جيبت الكراسه وبدأت اكتب ورد المحاسبه بتاعي تاني

الصلاه علي مواعيدها

ورد القرءان

والاستغفار

الاذكار

القرءاه في سيرة الرسول والصحابه والكتب العامه

كنت بشغل نفسي بأي حاجه عشان مفكرش فيه

معلمتي دايما كانت بتقول

" نفسك إن لم تشغلها بالحق شغلتك بالباطل "

كلمت معلمتي واخدت مواعيد دروس القرءان تاني

خرجت أكلت مع بابا وماما

دخلت نمت

حطيت راسي علي المخده ، شيفاه ، وحشني ، حسه إني مشيت وسيبت روحي معاه

الله يسامحك يا خالد

نمت


عدت الأيام ، مابين وجع وبكاء ، الشيطان كان كتير يقول كلميه

فكنت الاقي كلمه بابا بترن " من ترك شيئا لله عوضه الله خيرا منه "

الشهر جاب شهر ، عدا ٦ شهور علي اخر مره شوفته فيها

وحشني اووي ، يارب أنساه يارب

حاسه إني روحي معاه وانا جسم بس

نزلت حضانه اشتغل فيها عشان أهد حيلي ف ارجع تعبانه ما اشوفش قدامي

في يوم وانا واقفه بدرس للاطفال ، لقيت بابا بيتصل

منه تعالي ضروري دلوقتي عاوزك

خير يابابا ؟! إنت كويس ياحبيبي ؟!

ايوه تعالي يلا بسرعه


خرجت زي المجنونه ركبت اول تاكسب قدامي

روحت وفتحت الباب لقيت ماما بتقولي فيه ضيوف مع بابا جوا وبابا عاوزك !

دخلت وكانت المفاجأه ، خالد 🐸🐸

قعدت زعقتله ، إنت إيه الي جابك هنا وعاوز مني إيه

انا ماصدقت بابا سامحني

بابا زعق ، منه إسكتي عيب واقعدي

قعدت ، لقيت بابا بيقول انا هسيبكم تتكلموا شويه

قعدت خالد باصصلي وساكت

قطعت الصمت ،قولتله أخدتلي كام صوره ؟!

نعم ،!

ايوه أخدتلي كام صوره هتفضل باصللي وساكت إنجز عاوز إيه

قعد يضحك ، هو إنت لسه لسانك طويل زي ما أنتي

ضحكت وسكبت


بدا يتكلم ، فاكره يامنه ، أخره مره شوفتك فيها ؟!

ايوة فاكره لما سيبنا بعض

تعالي بقي نتكلم بصراحه ، انا كنت بتسلي بيكي ، ااه زي ما إنت سامعه كدا ، ولا كنت هتجوزك ولا اي شئ
كنتِ فتره زيك غيرك ، بتسلي ، وكنت لما اجي اتجوزهدور علي البنت المحترمه

البنت الي بتعرف تصون عرض ابوها ، البنت الي بتبقي ب ١٠٠ راجل مع اي راجل برا ، البنت الي هنزل واسيبها بيتي وولادي وانا مطمن

روحت بعد اخر مرة معاكي، وانا بقول عادي زيها زي غيرها مش فارقه مشيت دي هلاقي ١٠ هضحك عليهم بكلمتين حلويين وشويه اهتمام بتاع البنات ده والدنيا بيس

بس كان كلامك في وداني وجعني فعلا ، فتحت فيس لقيت الواد محمد صحبي منزل خطبه للشيخ حاوم شومان بعنوان " مستني إيه " معرفش ايه الي خلاني اسمعها مع اني ابعد مايكون عن الدين ، وكانت البدايه ، قعدت ابكي علي كل الي عملته فيكي وفي غيرك ، علي الصلاه وحياتي الي مالهاش وش من قفا دي 😂😂

لقيت نفسي بتوضي ونازل المسجد صليت ، كاني اول مره اصلي
انا فعلا اول مره اصلي من زمان اووي ، وقمت اتوضيت وصليت ركعتين توبه ، روحت كسرت خط الموبيل الي عليه ارقام البنات

غيرت الاكونت

بقيت انوي كل فرد صلاة انزل اصلي في المسجد ، دا انا حتي أعفيت لحيتي طولتها، بس إنتي مكنتيش بتغيبي عن بالي

انا شكلي حبيتك يابنت اللذينه ولا ايه


كبرتي في نظري جدا بعد اخر مره ، حسيت ان انتي فعلا اللي، هستأمنها علي بيتي وولادي وديني يا منه
حسيت إني مينفعش أتجوز غيرك ، أنا معرفش أنا حبيتك كدا إمتي وإزاي ، بس الوضع جوايا إتشقلب ١٨٠ درجه
بقيت خايف تضيعي مني خايف تروحي لغيري ، كنت أحيانا كتير بستغرب ، هي فرقت إيه عن غيرها ، ما أنا كلمتها بدالها ١٠٠ محدش فيهم فرق معايا ، لما شوفتك وعجبتيني راهنت عليكِ إني هوقعك ، كنت عارف إنك مش بتاعت الرغي والكلام دا ، بس عرفت أحببك فيا ، أنا عارف إنك حبتيني
بصي يامنه أنا مش عاوز أفتكر إلي فات ، عاوز نبدأ عهد جديد لينا سوا ، عاوز أعوضك عن كل وجع شوفتيه علي إيدي يامنه ، تتجوزيني ؟!

خالد ، إنت عارف إنت بتقول إيه ؟!
أنا أول مره أبقي عارف أنا بقول إيه ،إنتِ هتبقي أول حاجه صح أعملها في حياتي ، إنتِي النعمه الي ربنا لما بيحب عبد بيرزقه بيها 🙈🙈

موافقه يا خالد موافقه طبعا ، أنا عمري ماكنت أتخيل إن كل دا يحصل ، انا لما سيبتك أخر مره كان قلبي واجعني اوي ، بس مكنش ينفع ! مكنش ينفع أكمل واعصي ربنا وأخون بابا وأكسره أكتر من كدا ، كان لازم أبعد
لما رجعت وبابا قالي " من ترك شيئا لله عوضه الله خيرا منه " بس أنا عمري ماتخيلت عوض ربنا بالشكل دا
انا موافقه يا خالد ، بس بابا مش عارفه هيوافق ولا إيه

باباكي انا حكيتله علي كل حاجه ممكن تتخيليها ، وهو موافق وكمان وافق إن كتب الكتاب يبقي الخميس الجاي وقال
إيه إيه إستني كتب كتاب إيه !! كتب كتاب مين الي الخميس الجاي ؟! إنت أهبل
أهبل ، مش بقولك ربنا عوض قصرك في طول لسانك 🐸🐸

أيوه الخميس الجاي وكل حاجه هنظبطها لسه فاضل إسبوع ، هو إحنا ليه هنعمل خطوبه وبتاع ، وبعدين مش هعرف أصبر أنا علي حدود الخطوبه ان شاء الله كتب كتاب معاه دوخله .
حدود الخطوبه لا دا الموضوع وسع فعلا منك 😂😂
خلاص انا هقوم أنادي بابا يجي وتتفقوا
مشيت خطوتين ووصلت علي الباب
سمعته بينادي ،دورت بصيت
نعم يا خالد

خدي الشنطه دي ! حاجه كان طول عمرك نفسك فيها

أخدت الشنطه ، فتحتها ، إيه دا 🙈🙈

نقاب ، بتهزر ، إنت هتوافق ألبس النقاب ، بجد ؟!

موافق يامنه، موافق علي أي حاجه هترضيكي ويرضا بها الله عنكِ جريت ناديت بابا ، سيبتهم ، إتوضيت وصليت شكر لله ، طول ٦ شهور بعيط حزن ، بفضل الله ورحمته كنت ببكي من كتر ما انا مش مصدقه ، سبحانك يارب
عدت الأيام بسرعه ، نزلت جبت الفستان مع خالد وبابا ،

خالد جاب كوافيره في البيت ، كل حاجه كانت يسيره


لبست الفستان ، ولبست النقاب ، خالد دخل بعد ماجهزت ، قرب مني نزلي النقاب
يخربيتك يا خالد ، يخربيتي فعلا ، أنا كنت هسيب الحلاوه دي والضحكه الحلوه دي ، لغيري 💙


الخلاصة .. 10

حاجات لازم تعملي بيهم في حياتك.


١-لازم تكوني مقتنعه انك مش ضعيفه ومش سهل تتهزمي.. الحياه مش بقوه الجسم .. اهتمي بعقلك وانتي تبقي احسن من ١٠٠ راجل.

٢-ربنا اداكي قلب تمشي بيه بس اداكي عقل تشوفي بيه انتي ماشيه فين .

٣-نهايه علاقه او جواز مش نهايه العالم ده باب اتفتحلك لدنيا اوسع .. بس انتي وسعي ادراكك للموقف.

٤- اي مشكله هي مجرد مشكله واحنا الي بنخليها كبيره او صغيره .. متوقف علينا احنا.

٥- الي انتي فيه ايان كان هو محطه مش نهايه الرحله.

٦-جمالك هيجبلك الراجل الي بيعرف يبص ولكن عقلك وطريقه تفكيرك هتجبلك الراجل الي عقله كبير.

٧-مش هتقدري ترضي كل الناس .. علي الاقل ارضي نفسك وحافظي عليها.

٨- اي غلطه هي عباره عن درس انما او اتكررت تبقي عباره عن غباء.

٩-السعاده مش في حاجه بره . دوري علي سعادتك جواكي .. اسهل وااقرب.

١٠-الي ميحسش بحزنك ،عمره مهيكون سبب سعادتك .



( انت بقي ك شاب متلعبش ببنات الناس
اللي هتعمله فب بنات الناس هيتعمل في اختك _ في بيتك _ في( زوجتك المستقبليه )


>> (كما تدين تدان ولو بعد حين ) <<

وانت كــ بنت ( متبفيش هبله كده وتحبي وتعي ودوبي من اول حاجه كده ..

امسكي نفسك .... ونصيبك جايلك جايلك طاما صاينه نفسك ..






13-07-2018, 06:33 PM
أنيس
مشرف عام
رقم العضوية: 445600
تاريخ التسجيل: Jan 2014
المشاركات: 5,792
تلقى دعوات الى: 1105 موضوع
إعجاب: 7,819
تلقى 4,635 إعجاب على 2,574 مشاركة
 
( انت بقي ك شاب متلعبش ببنات الناس
اللي هتعمله فب بنات الناس هيتعمل في اختك _ في بيتك _ في( زوجتك المستقبليه )


>> (كما تدين تدان ولو بعد حين ) <<
بارك الله فيك أخي الكريم على هذه الموعظة !!.
ولتمام الفائدة فقد سمعت عن قصة حقيقية مفادها باختصار شديد :
شاب من الأثرياء أشترى شقة خاصة في المدينة التي يعيش فيها ,
واستغل هذه الشقة للعبث ببنات الناس وأعراض البشر ,
ومن خلال هذا السبيل اكتسب جملة من الأخلاء الذين يشاطروه هذه الطبيعة ,
وفي ذات يوم أخبره أحد زملائه عن موعد مع إحدى البنات وعليه أن يحضر بالموعد المحدد .
ما كان من الشاب صاحب الشقَّة إلا أن أرسل له مفتاح الشقة معتذراً عن الحضور بسبب التزامه الشديد بأمر ضروري ,
وعند عودة الشاب من موعده الضروري التمس قلق أهله الشديد على تأخير عودة أخته إلى البيت على غير عادتها بالخروج ,
باتت جميع العائلة تتجرع القلق والتوتر والخوف على ابنتهم وقد أخروا التبليغ بالأمر خشية الفضيحة .
وفي ضحوة اليوم التالي وحين ذهب إلى صديقة ليسترد مفتاح الشقة ,
قابله صديقه باللوم على عدم الحضور وأخذ يُباهيه بجمال البنت وقال :
يمكن إنك ستجد البنت في الشقة لأنها كانت قد تعبت جداً بسبب تمتعنا فيها نحن السبعة أشخاص طيلة الليلة .
والمفاجأة العظمى كانت أن وجد في الشقة أخته قد عانقت الموت وهي عارية في أسوأ منظر تلتمسه عيناه ,
والختام هناك حديث خرَّجه الألباني في الأحاديث الضعيفة لكنه يحتوي العبرة :
" البر لا يبلى ، والاثم لا يُنسى والديان لا يموت ، فافعل ما شئت كما تدين تدان . " .

13-07-2018, 11:03 PM
ahmed 12 salah
الوسـام الذهبي
رقم العضوية: 700352
تاريخ التسجيل: Dec 2015
الإقامة: >> ( Egypt ) <<
المشاركات: 1,676
تلقى دعوات الى: 793 موضوع
إعجاب: 1,305
تلقى 1,126 إعجاب على 521 مشاركة
 
المشاركة الأصلية كتبت بواسطة أنيس 
!!.

" البر لا يبلى ، والاثم لا يُنسى والديان لا يموت ، فافعل ما شئت كما تدين تدان . " .
والله مواضيعي ما بتحلي الا بردودك وثباتك بالاحاديث والحكم ....

14-07-2018, 12:13 PM
حنايا الروح
VIP
رقم العضوية: 997228
تاريخ التسجيل: Nov 2017
الإقامة: جمهورية مصر العربية
المشاركات: 1,439
تلقى دعوات الى: 11 موضوع
إعجاب: 2,511
تلقى 2,289 إعجاب على 1,120 مشاركة
 
بارك الله فيك وجزاك خيرا
كل التقدير والاحترام


انا بحبك ! ايييه بحبك ؟ بتحبني باماره اييه ! "واقع نعيشه "



Powered by vBulletin® Version
Copyright ©2000 - 2018, Jelsoft Enterprises Ltd.
The owner and operator of the site is not responsible for the availability of, or any content provided.
Topics that are written in the site reflect the opinion of the author.
جميع ما يُطرح من مواضيع ومشاركات تعبر عن رأي كاتبها ولا تعبر عن رأي مالك الموقع أو الإدارة بأي حال من الأحوال.