أستغفر الله العظيم ... سبحان الله وبحمده



العودة   منتديات داماس > المنتديات العامة > منتدى الشعر العربي والخواطر والنثر


مواضيع مميزة  


آخر عشرة مواضيع المواضيع النشطة


06-02-2012, 08:38 AM
جمال عبد العزيز م غير متصل
شُعراء البوابة
رقم العضوية: 391047
تاريخ التسجيل: Oct 2011
الإقامة: مصر
المشاركات: 254
إعجاب: 3
تلقى 89 إعجاب على 44 مشاركة
تلقى دعوات الى: 4 موضوع
    #1  

من وحى الثورات العربية


هاج الحمير وسط الغطان
الفول خدوه
التبن والبرسيم .. شلوه
ناقص يبيعولنا الهو
والميه بكره هيشربوها وكل حاجة هتبقى بينا...
سوا سوا
******
يا ما اتركبنا في البلد
ركبونا قبل ما نتولد
وكبرنا شيلنا الهم شيل
وتعبنا دوبنا نهار وليل
وياريتها كانت في التعب..
كان شيئ بسيط
دا الذل كنا نعيشة احمال تتربط ..
فوق (الغبيط)
وال يشوفنا مقهورين
ويحس بالذل ف عيونا ودبلانين
يقول دا صنف حمار.. ولازم يترعب !!
ملهاش يادوب .. غير التعب
وعشان تعلمها الطريق.. حتما ولازم تتركب !!
ولا تتحكم غير باللجام
******
لو حب حد يهين أخوه
يقول حمار
لو حب حد يشق ترعة ويبنى جسر او جدار
فين الحمار
يشوفونا بس في المرار
حتى البساطة والطيابة والشهامة في عرفهم...
بيقولوا عار
بس الغلابة زينا راح تعمل ايه
دا الفقر مالى كل دار
والجهل سارح فينا يلعب ليل نهار
والقهر قاطم وسطنا .. صغار كبار
والكل راكب ضهرنا
والحبل شادد بقنا
وباختصار..
الذل حاكم امرنا
لازم قرار
*****
ايه القرار؟
لازم نثور
لازم نعبر عن مشاعرنا الدفينة باى لون
ونحس بالعدل ال قالوا عليه جنون
حرية .. قبل الأكل والنوم والعمل
وكرامة.. تزرع فينا أشجار الأمل
اخريتها ايه؟
راح يعمل ايه شيخ البلد؟
او حتى كان العمد او كان مين يكون؟
راح يربط البق بلجام؟
راح يقسم الضهر بحزام؟
راح يقطع الشبكة وهنبطل كلام؟
ريحين نقاوم للنهاية فالمقاومة مش حرام
******
خططنا رتبنا الصفوف .. هندارى ليه
والكل عارف م البداية دوره ايه
وحميرنا بالخارج معانا راح تشارك بالمساندة والمدد
وهنكسر الخوف اللعين .. زى(الوتد)
بس إن عجزنا....
نطالب الإخوة البقر
حتى البهايم والكلاب
ونحط ايدنا ف ايد اعادينا الدياب ..او حتى ثور
ونقودها ثورة للعبور
*****
حتى ولو جات النهاية وخاب املنا في النجاة
لو حتى حرمونا الحياة
والعمدة اعلنها جزارة ومجزرة
واخونا في بلادنا القريبة والبعيدة بهدلونا مسخرة
ويشوفوا شاشات الجزيرة يعدوا بس المجروحين
والمقتولين
والمأسورين
لكن يادوب .. يترحموا
حتى الكلام؟؟ ممنوع كمان يتكلموا
لكننا ..مش ياسانين
ولاراح نقول للخونة يوم... (متأسفين)
لازم جميع الخلق تعرف مين بقى في الارض دى
صاحب قرار
ونعرف الاخوة الكبار..
(من منطلق لغة الحوار)
(من منطلق دول الجوار)
(وبفكرهم... مش فكرنا )
(وبعقلهم... مش عقلنا)
مين فينا اجدر يتركب ....يبقى الحمار
يا الموت ... يا اما العمدة يرحل يتخلع
حتى الكبار دول كلهم..
(حوفر) ولازم يتقلع
******
نعلنها صحوة للضمير
طول عمرنا عيشين حمير
اكلين حمير .. نايمين حمير
أيه راح يسير ..
لو موتنا مرة بعزنا ...موته حمير
بس المهم... نسيب رسالة للبشر ..اقصد لأشباه البشر
(الحيونة) مش بالعمل
(والحيونة) مش بالبساطة في الامل
(الحيونة) انك تعيش ميت سجين
وف وسط اشجار الفرح .. (مربوط ) حزين
(الحمرنة) ماهش ف جنس وجنس لاء
(الحمرنة) هى الغباء ...(الحمرنة) هى الدهاء
(الحمرنة) خيبة رجاء
(والحمرنة) إن ال يتحكم ويحكم فيك حمار
(والحمرنة) إن ال يتكفل بعلمك او بحملك او بامرك..
يبقى اتفه من حمار
(والحمرنة) مش فتونة ولا منظره
(الحمرنة) فكر ف دماغ مش فهلوه
******
واللحظة جات
والثورة قامت رجعت كل ال فات
رايتها بيضة ف السما
رفعت ايديها لربنا
نعيزين كرامة يا بشر
والظلم لازم ينكسر
والحق لازم يترسم
على كل دار
ويبان لكل الخلق مين فينا الحمار
العمدة وحميرة الكتير
وللا ال قاعدين تركبوه
قلتوا حمار
واتلم كل المجروحين
والمظلومين والمركوبين
خاف الكبير قلبه اتفزع
قال لغفر
لموا الحمير جوا الزرايب تنقهر
باين عليها الساعة قامت في البلد
والعرش بادى يندثر
لما الحمير للمستوى دا تنحدر
يادى البدع
ستين سنة والكل نايم في الخفر
ليه عندى انا الكل عايز ينفجر
هى النهاية للغجر
*****
بس الميدان قال كلمته
رد القدر
الله اكبر للغلابة تنتصر
الله أعظم والكبير راح ينكسر
والحق بان
وسط الميدان
مين ال لازم يتركب
مين البشر
مين الجبان

جمال نصير في 8/1/2012





المواضيع المشابهه
الموضوع كاتب الموضوع المنتدى مشاركات آخر مشاركة
مخلفات الثورات ، الجازية المنتدى العام 7 01-12-2011 01:08 PM
عاجل : القبض على محركو الثورات العربية ! دين الحق صور - طرائف - الغاز - مسابقات - تسالي - مرح - نكت - فوازير 4 13-03-2011 05:51 AM
طلب برنامج لتصميم البنرات باللغة العربية دون وسيط ,, Abo fatema برامج 13 19-06-2008 09:11 PM
مجموعة من البنرات البرق خلفيات فوتوشوب - فريمات وزخارف للفوتوشوب GFX 8 28-10-2006 05:59 AM
مجموعة جديدة من البنرات البرق خلفيات فوتوشوب - فريمات وزخارف للفوتوشوب GFX 5 06-12-2005 02:21 AM
 


من وحى الثورات العربية

English

Powered by vBulletin® Version
Copyright ©2000 - 2017, Jelsoft Enterprises Ltd.
The owner and operator of the site is not responsible for the availability of, or any content provided.
Topics that are written in the site reflect the opinion of the author.
جميع ما يُطرح من مواضيع ومشاركات تعبر عن رأي كاتبها ولا تعبر عن رأي مالك الموقع أو الإدارة بأي حال من الأحوال.