أستغفر الله العظيم ... سبحان الله وبحمده



العودة   منتديات داماس > المنتديات العامة > صور - طرائف - الغاز - مسابقات - تسالي - مرح - نكت - فوازير


مواضيع مميزة  


آخر عشرة مواضيع المواضيع النشطة


15-01-2012, 11:51 PM
قمرالشام غير متصل
الوسـام الماسـي
رقم العضوية: 206891
تاريخ التسجيل: Jan 2009
المشاركات: 7,011
إعجاب: 1,299
تلقى 3,511 إعجاب على 936 مشاركة
تلقى دعوات الى: 2 موضوع
    #1  

صرنا زمان ما حكينا بالشامي ....خطبه...جواز...والاولاد


مساء الخير و الورد و الفل
قبل ما بلش بشي
أبو رائد إذا ما فهمت شامي بسيطه
في عندك ابو محمد وابو مصطفى واذا ما عرفتوا اسألوني


صرنا زمان حكينا بالشامي ....خطبه...جواز...والاولادصرنا زمان حكينا بالشامي ....خطبه...جواز...والاولاد


صرلنا زمان ما اجتمعنا حول البحرة جمعة دافية و حنونة من وقت سهرات السنه الماضيه الله يجزيكم الخير ما عاد شفنا بعض
يلا جيبو الأركيل و صحن النقرشة و تعالو بمشئيتي
و هي دعوة خاصة للعروس لتقعد بالصدر لأن الصدورة للبدورة

إن كان اهل الشام متمسكين بالعادات القديمة خصوصاً الخاصة بالخطبة و الزواج لكن مع هيك انذثر الكثير منها
و دائماً كنت اسمع جملة "يييييييي على بنات هل الايام نحنا زمانا كان غير"

كلمة "غير" تحتوي الكثير و الكثير من الأشياء التي ربما سمعتم بها لكن ليس بالضرورة تعرفونها بالتفصيل

خليكن معي لنتابع تفاصيل الخطبة و الزواج و الانجاب في دمشق





الخطبة:
"شو يا رجال ما بدك تفرح بابنك ما شاء الله صار شب مشورب"
"و الله صار رجال و صار لازم نفرح فيه"
"يعني اتكل على الله و دورلو على عروس ابن عمي"
"و نعم الاتكال"
و هيك بتكون الأم اخذت أول موافقة بالبحث عن عروس المستقبل زوجة ابنها و كنتها

و تأتي الآن الخطوة الثانية و هيه أن تجس نبض ابنها و تعرف منو شلون حابب عرستو تكون
طويلة قصيرة بيضا سمرا
و بضلها تشجعو مشان يحكي لأن الخجل بيمنعوا انو يقلها بدو يتزوز و هيك بتشجعو و بيحكيلها بالتفصيل شو ببالو
طبعاً بالنهاية رح تختار على ذوقها هيه مو متل ما بدو لأنها بتعرف مصلحتو اكتر منو و لازم بنت الحلال تكون مرباية و من عيلة مستورة من عيل الشام صاحبة دين و تقوى
و سمعة ابوها متل الليرة الذهب
و أمها كل شي إلا امها لازم تكون نظيفة و متئنة و طبخها طيب لأن طب الطنجرة على تمها بتطلع البنت لأمها
و هيك بتكون الأم اخدت الاشارة الخضرا بالبحث عن كنتها
و تخبر جيرانها و خصوصي الداية مشان يببدو بالتدوير عن بنت الحلال لي بتوافق المواصفات المطلوبة و ما يزيد عمرها عن 16سنة

يلا يا حريم لفو ملاياكن و خلونا نطلع ندور نشوف المستورة بنت أم محمد....
قبل ما تلفو ملاياتكم
شوفو شروط الشب

قال شو بيقول لأمو وأخواتو البنات
بس عملوا جهدكن تكون مجذبة
منشان يقولوا سبحان الذي خلقها شو أنها مجذبة ..
ومكحلة طبعاً يكون كحل رباني مو من عند ماكس فاكتور
وتكون ملفوفة يعني ممتلئة الجسد دون بدانة
و تكون مبودرة بيضا شقرا ... وخدودها حمر
ومتكلمة يعني يكون حديثها و منطقها حلو يعني ملفظ كلامها مرتب
مو تقطع و تلحش

وقبل ما تحطو الملايا يا حريم عملوا جهدكن تكون
مقدرة أكابرية وراكزة : تقيلة ومو طرطوعة ... وفهيمة يعني راجحة العقل
وكتفها راتب يعني يكون كتفها أكابري .... وموجبة يعني صاحبة واجب
وأهم شي تكون متأنة : تتقن الأشياء و مرتبة
لهلوبة : نشيطة الحركة مو نايطه .
و لا نتسوا تكون نغشة هي أهم شي يعني خفيفة دم و قريبة على القلب ودلوعة
وما يكون شعرها عيرة ... شدولها شعرها و تأكدوا منه

والله يحرسكن و يخليكن ( نون النسوة )

بالروحة و الجية
و اسألوا عن أمها ما تكون قوية
و أخواتها البنات و خالاتها و عماتها
و بيقول المثل :
خدوا البنات من صدور العمات
( جمع مؤنث سالم )


يلا الله معكون لا تطولو

خلينا هلئ انكمل الله يخليلي يا كن
بعرف اني طولت بس هي جوازة العمر مو لعبه

الفصل التاني


امو للعريس بتاخد معا اختا وخالتا وعشره من حارتا

ايه يلا تأخرنا على الجماعة و الله ما حلوة امشي ام عبدو خلينا نروح نشوف المحروسة
و بس وصلو لعند الجماعة و قعدو و لمحت أم العريس البنت من بعيد بتسأل أم العروس فوراً
حصنتها بالله المحروسة بنتك؟؟
اي و الله الله يسلملك ي عالبنات شو بيكبرونا بسرعة
اي لاء اسم الله عليكي لسعتك باول صباكي ان شاء الله بتفرحي فيها و بضلي سالمة فوء راسها و تشوفي ولاد ولادها.

طبعاً هذا كلو لسا البنت ما فاتت لعند الضيوف ولا سلمت على الضيوف
و من أهم الأشياء لي لازم البنت تتعلمها هيه تقديم القهوة للخطابات لأن تقديم القهوة يتوقف عليه الكثير ما بصير ترفع ايدها مثلاً بالصينية و هيه عم ضيفهن لازم توطي الصينية مشان الضيوف يقدرو ياخدو الفنجان بدون ما يندلق
و لازم لما تفوت حاملة الصينية تشد ظهرها ما تحنيه و تكون ايدها ثابتة بالصينية
و أهم شششي يكونوا الفناجين و كاسة المي ناشفين مو ملئلئين غاسلتهن العروس مو منشفتهن ايوه
و الأم بتعلم بنتها كلمة سر يعني مثلاً وقت يكونوا الخاطبات البنت بنتكون قريبة من الليوان و بس ندهت عليها أمها و قالتلها يا فلانة شئي على الطبخة بلا ما تحترق
بتعرف البنت انو صار الوقت لي لازم تفوت فيه القهوة
و هيه ام العريس شافتها من هون وفوراً بدت
بسم الله و ما شاء الله , حصنتها بايات الله, حصنتها بياسين, حندء بندء عين تشوفها و ما تصلي على النبي تطء و تنبوء

طبعاً بهل الأثناء بتكون البنت دااااابت خجل و وشها صار احمر متل الشوندرة و هيك أم الشب بتقوم بتاخد منها القهوة و بتسلم على البنت و بتبوسها و بضمها على اساس شو انو هي محبة و نفس الشي بيعملو كل الخاطبات
ولي بكونوا عم يعملوه بالحقيقة هو أول شي عم يتلمسو بشرتها ناعمة ولا خشنة و مأشبة "متقشرة و خافة"
و يشموا ريحة تمها ياترى طالعلها ريحة تم ولا لاء
و ريحة تحت باطها "الإبط" ياترى نظيفة و ريحتها صابون ولا نتنة و ريحتها قرف و عرق
ياترى تيابها نظاف ولا ريحتهن زفر و طبخ
و ما بينسوا الخاطبات كمان يشدولها شعرها مشان يتأكدو انو طبيعي
و يسألو عن لون عيونها اذا طبيعي ولا عدسات "على الرغم من انو ما كان في عدسات بهديك الأيام او كانو قلال كتير و غير دارج استعمالهن"
حتى ان بعض الخاطبات كانو ياخدو معهن جوزة مشان تكسرها العروس بسنانها مشان يتأكدو من قوة اسنانها

و بس انتهى هل الامتحان بتتوجه العروس الى خارج الغرفة و الأنظار كلها عليها عم يراقبو مشيتها و أدبها و خفتها و كسمها و رسمها.

و بعدها بيشربوا الخاطبات القهوة و بينهوا الزيارة لأن من أهم عادات الشام انو الزيارة تنتهي عند تقديم فنجان القهوة على قولة المتل " الضيف المنظوم بيشرب القهوة و بيقوم".
بعد أن انتهت الزيارة الأولى للعروس بالقبول و الرضا المبدئي من جهة أم الشاب
تتوالى الزيارات لبيت العروس بدون موعد مسبق مشان يشوفوا البنت بكل الأوقات بوقت الغسيل و الطبخ و التعزيل
و كمان مشان يتأكدو من نظافة أهل العروس و أمها و بيتها
ومتل ما بقول المتل المكتوب مبين من عنوانو و عنوان البيت بابو لذلك لازم باب البيت الخارجي يكون نظيف
لازم دائما لما نحكي عن حريم الشام و نسوانها نأكد على موضوع النظافة التي قد تصل حد الوسوسة
حتى إن الخاطبات قد يستغلون أي فرصة لاستكشاف نظافة البيت مثل أن تقوم أحدهم باسقاط مفتاحها مشان تنحني تعمل حالها عم تجيبو و تتأكد من نظافة الأرض تحت الفرش و الكنبات
أو ان ترفع طرف السجادة للتأكد من نظافة الارض تحتها
و غالباً بتروح عمات العريس او خالاتوا او اخواتوا لتأكد من كل هل الأمور و طبعاً ما ننسى الزرية المصفوفة بأرض الديار و الشبابيك.
كل هل الأمور بتحدد اذا كانت هي هيه عروس المستقبل ولا ورطة و الهريبة منها نعمة.

طبعاً بهل فترة هي بكون أهل العروس سألو عن العريس و أهلو و سمعة أبو و مالكاناتو "أملاكه" و كارو "عمله"
و دينو و أخلاقه و اطباع اخوته البنات "بنات الأحمى" و اطباع السلايف ان وجد "زوجات اخوة الشاب"

و في حال انو أهل العروس ما عجبهن الوضع تخبر أم العروس أهل الشاب انو مافي نصيب و بغالب الأحوال سيسأل أهل الشاب عن السبب و هنا لا يبقى لأم العروس إلا ان تضع حجة ما و غالباً ما تكون
___ و الله يا أم محمد عملنا استخارة و ما طلعت منيحة

أما اذااااااااااا تجاوزنا كل الاختبارات الماضية بنجاح و استمرت الزيارات و كان واضح استئناس الطرفين و موافقتهن المبدئية
بتجي الخطوة التالية و هيه حمام السوق........


تووووووووووووووووووووووووووووووت

هالمقطع شفرو ابو محمد

المهم
البنت نالت اعجاب الاهل وخلينا هلئ نحكي عالشب

اي تشكلو آسي ما بدكن كمللكن شو صار بالزوازة
هذا يا جماعة الخير بعد ما تأكدو أهل البنت انو الشب ابن حلال مصفى و صاحب دين و من عيلة معروفة اباً عن جد و معلم بكارو بيشتغل مع ابوه و شيخ الكار بذات نفسو أكد هل شي

بعد ما اتأكدو أهل الشب انو المستورة بنت عالم و ناس و جمال و مال و حشمة و أدب و أخلاق و ما باس تما غير أمها و على قولة أم العريس حلوة و بيضا متل لهطة القشطة

صار وقت اجتماع الرجال
و كرمال عريسنا و أبوه اجتمعو كباريت الحارة "كبار الحارة" و بمعية شيخ الحارة اخدو موعد من ابوها للمستورة مشان الطلبة يوم الخميس بعد صلاة العشاء
و هيك ابوها للعروس أعد نفسو أحسن اعداد يوه ضيوف جاين و داقين بابو ما حلوة ما يلاقو كل شي من احسنو من اصول الضيافة الى نظافة المنزل
و يصل الضيوف بالوقت المحدد......
و تبدأ التحيات و المجاملات و الترحيب بالضيوف و كبار الحارة و أخبار العمل و يبقى العريس صامتاً فمن غير الأدب ان يكثر الحديث كي لا يبدو "دالق حالو"
و هيييك حتى يتحين أحدهن الفرصة المناسبة لفتح الحديث و غالباً ما يتحدث أكبر الموجودين أو العم الأكبر للشاب او ابوه
اي سيدي نحنا دايسين بساطك و طالبين الارب منك ببنتك على كتاب الله و سنة رسوله ص

و بما ان والد العروس عنده علم مسبق وموافقة أولية من نساء فيجيب بعبارات المجاملة

شرفتونا و النعم منكن و الله البنت بنتكن و انتو اهلها و ما عليكن غير تلفوها و تاخدوها

" على اساس شو انو الأب مو فارقة معو المهر و الشروط المادية و جاهزية العريس و بيتو او بيت اهلو لي رح تسكن فيه العروس"

طبعاً هون يتدخل احد من جانب اسرة الشاب فيقول
لاء الأصول أصول و الشرع شرع لازم نحدد مهر البنت

و هنا يبدأ النقاش حول النقد "المقدم و المؤجل"
جرت العادة بالشام ان يكون مهر الفتاة مثل قريناتها اي مثل مهر اختها او بنات عمها

و هون اذا بالغ الأب بطلب المهر بكون سبب من اثنين يا أما ما بدو يجوز بنتو على قولة المتل لي ما بدو يجوز بنتو بغلي مهرها

او انو اهل البنت داخلين على طمعة و بهل حالة يفض اجتماع الرجال بحجة المشاورة

اما اذا تم الاتفاق فتقرأ الفاتحة على نية التوفيق

طبعاً النقاش في موضوع المهر قد ينعدم تقريباً في اسر الشامية الورعة و التقية تمثلاً بقول رسول الله صلى الله عليه و سلم " اذا جاءكم من ترضون دينه و خلقه فانكحوه الا تكون فتنة في الارض و فساد عريض"
فاذا توفر ذلك في الشباب فعلى بركة الله حتى ان بعض الاسر يساعدون الشاب في مصاريف الزواج و يكون جوابهم دائماً
"نحنا عم نشتري رجال"

و كان المهر في مطلع القرن الرابع عشر الهجري يترواح تقريباً المقدم بين 30 ليرة و 50 ليرة و المؤجل 300 قرش الى 600 قرش طبعاً للبكر أما المطلق او الثيب فأقل من ذلك

و طبعاً ام العروس بتكون عم تخانق بنتها لي خجلانة انو تفوت على غرفتها مشان ما تسمع شو عم يحكو الرجال بالوقت لي بكون قلب الأم فيه على نار مشان تعرف اذا قروا الفاتحة أو لاء
بعد قراءة الفاتحة و مباركة ام العروس للعروس لي بتكون دااااااااااابت من الخجل و هربت على غرفتها

بعد كم يوم يقدم أهل الشاب هدية ليرة ذهبية لأهل الفتاة أو مبلغ من المال
و يتم الاتفاق على موعد لكتب الكتاب لي رح يكون ببيت العروس او حدا من أقربائها
فعادات أهل الشام تقول ان كتب الكتاب على العروس و العرس على العريس و ما زال هذا العرف قائماً حتى يومنا هذا
حيث أن اهل العروس ملزمين بنفقات كتب الكتاب و حفلة النسوان اذا تم الاتفاق على ذلك

لازم ما انسى كمان الاتفاق على موضوع الجهاز "تجهيز العروس من ملابس و مستلزمات شخصية" في بعض الأحيان يطلب ابو العروس مبلغ من المال يسمى ملبوس بدن او يتكفل اهل العريس بالجهاز او اهل العروس على حسب الاتفاق

و هيك فينا نبارك للعروس و نقلها ان شاء الله زوازة الدهر
صرنا زمان حكينا بالشامي ....خطبه...جواز...والاولادصرنا زمان حكينا بالشامي ....خطبه...جواز...والاولادصرنا زمان حكينا بالشامي ....خطبه...جواز...والاولاد

صرنا زمان حكينا بالشامي ....خطبه...جواز...والاولادخلصناصرنا زمان حكينا بالشامي ....خطبه...جواز...والاولاد
وعئبال ما نحكي عالمباركه بعد اول ولد






المواضيع المشابهه
الموضوع كاتب الموضوع المنتدى مشاركات آخر مشاركة
كان زمان ويا ريت نرجع زى زمان زهرة زهور عالم الطفل والأسرة 4 11-02-2015 06:27 PM
استضافة موقعك 5 جيجا فقط 300 جنيه و الله زمان يا اسعار زمان استضافة يور سيرف شركات استضافة المواقع والتصميم والبرمجة وتطبيقات الجوال 0 07-04-2013 04:04 PM
دعاء اللهم فاغفر لنا وارحمنا اذا سرنا الي القبور نبضات الامل المنتدى الاسلامي 1 01-04-2013 07:37 PM
ما هى حقوق الزوجه والاولاد ابوميدو المصراوى مُسْتَشارُكَ القّانُونيْ 1 07-03-2011 07:45 PM
نكته بالشامي قمرالشام صور - طرائف - الغاز - مسابقات - تسالي - مرح - نكت - فوازير 6 22-02-2009 09:30 PM
16-01-2012, 12:03 AM
mishosea غير متصل
عضو ماسـي
رقم العضوية: 319928
تاريخ التسجيل: Jan 2010
الإقامة: مصر
المشاركات: 1,218
إعجاب: 49
تلقى 156 إعجاب على 67 مشاركة
تلقى دعوات الى: 406 موضوع
    #2  
محتاجين ترجمه


16-01-2012, 12:19 AM
سعد الدين متصل
المسؤول الفني
رقم العضوية: 3
تاريخ التسجيل: Mar 2003
الإقامة: Türkiye
المشاركات: 40,875
إعجاب: 9,077
تلقى 15,567 إعجاب على 5,204 مشاركة
تلقى دعوات الى: 5091 موضوع
    #3  
ماشاء الله عنك اختي ام انس

القصة كاملة من طأطأ للسلام عليكم مانسيتي شي منها بنوب

الت لحالي هلأ بكمش عليكي شي نسوه لكن ما نسيتي شي بالعكس كله كامل وبأدق التفاصيل

الف مبروك للعروسين وعقبال لما نشوف ولادهم


16-01-2012, 12:22 AM
يسعد صباحك غير متصل
عضوية الشرف
رقم العضوية: 23076
تاريخ التسجيل: Jul 2005
المشاركات: 21,626
إعجاب: 7,793
تلقى 3,970 إعجاب على 505 مشاركة
تلقى دعوات الى: 482 موضوع
    #4  
لك ماتخافي أم أنس أخوك عم يفهم الحكي الشامي


وعشره من حارتا


لك هدول جايبن لحتى يخطبوا ولا ليعملوا خناقه ؟

" الضيف المنظوم بيشرب القهوة و بيقوم".
هي أول مره بسمع عن هالمتل

كمان فيه كتير شغلات بالزوازة أول مره بعرفها ,

لك أم أنس شو خلصنا ؟ عم بنتظر شو رح يصير بعد أول ولد

لحتى نبارك لهالشب المشورب ولي على آمته

إم أنس تعي بدي أسألك ,

لك شو صحن النقرشة ؟ هي مافهمت شو معناها

الله يسعدك أم أنس ويبارك فيك ,

موضوع رائع وبإنتظار الخبرية ( بنت أو ولد )



16-01-2012, 11:13 AM
قمرالشام غير متصل
الوسـام الماسـي
رقم العضوية: 206891
تاريخ التسجيل: Jan 2009
المشاركات: 7,011
إعجاب: 1,299
تلقى 3,511 إعجاب على 936 مشاركة
تلقى دعوات الى: 2 موضوع
    #5  
صحن النقرشه يا خيي
هو
صحن البزورات
يعني صحن الموالح
يعني صحن المكسرات المؤلف من
لوز وبندق وكاجو وفستق حلبي
واذا بدك صحن النقرشه عند ابو محمد بهالايام يعني بأيام الشتويه فهو مؤلف من:
صينية المته والتين اليابس والزبيب واحلى صحن نقرشه مع البزر الاسود وبزر دوار القمر

تكرم عينك غيرو في شي ما فهمتو

هههههههه

 


صرنا زمان ما حكينا بالشامي ....خطبه...جواز...والاولاد

English

Powered by vBulletin® Version
Copyright ©2000 - 2017, Jelsoft Enterprises Ltd.
The owner and operator of the site is not responsible for the availability of, or any content provided.
Topics that are written in the site reflect the opinion of the author.
جميع ما يُطرح من مواضيع ومشاركات تعبر عن رأي كاتبها ولا تعبر عن رأي مالك الموقع أو الإدارة بأي حال من الأحوال.