أستغفر الله العظيم ... سبحان الله وبحمده



العودة   منتديات داماس > المنتديات العامة > صور - طرائف - الغاز - مسابقات - تسالي - مرح - نكت - فوازير


مواضيع مميزة  


آخر عشرة مواضيع المواضيع النشطة


19-04-2010, 02:26 AM
MAHMOED غير متصل
عضوية الشرف
رقم العضوية: 153278
تاريخ التسجيل: Aug 2008
الإقامة: فى كنف الاخوان
المشاركات: 5,019
إعجاب: 1,515
تلقى 2,132 إعجاب على 501 مشاركة
تلقى دعوات الى: 1744 موضوع
    #1  

50 ميزه تخليك تحب مصر




1 من أهم المميزات التى يمكنك الحصول عليها فى الشارع المصرى هى..إنك ممكن تقفل الشارع بمزاجك من غير ما حد يعترض ، لو عندك حالة وفاة تستطيع أن تحول الشارع إلى دار مناسبات و تقفله بصوان بس تسيب ممر صغير للناس تعدى منه على رجليها علشان ماتسبِّش للمرحوم.

2 فى حالة لو عندك فرح ممكن تقفل الشارع من غير ماتسيب ممر للناس تروَّح علشان مافيش حد أصلا هيروَّح قبل الفرح مايخلص.

3 مصر هيا البلد الوحيده اللى ممكن تلاقى فيها سواق تاكسى يركِّبَك ببلاش ( حدث بالفعل مع كاتب المقال منذ عدة سنوات ،نتيجة لظرف ما كان يقف مفلسا فى جسر السويس يحلم أن يصل إلى مقر عمله فى وسط المدينة ، استوقف سائق تاكسى و سأله لو ينفع يوصله و يكسب ثواب، فنظر له سائق التاكسى من أعلى إلى أسفل ثم قال له إطلع ، وفى الطريق صارحه السائق بأنه قبل أن يوصله مجانا لأنه كده كده نازل وسط البلد ولأنه استريح له..هكذا و ببساطة).

4 لو ركبت تاكسى و فى جيبك شريط بتحبه ممكن تديه للسواق يشغله (وممكن كمان..علّى يا اسطى)،و سيزيد حماس سائق التاكسى لتشغيل شريطك إذا كان كوكتيل شعبى حيث العنب و المولد وقوللووه ،أو إذا كان خطبة عن عذاب القبر.

5 مصر هى الدولة الوحيدة التى تعرف فيها هتدفع كام قبل ما تركب التاكسى(فى أوربا والدول المتقدمه زى دبى مثلا فيه حاجة اسمها عداد)، هناك أشخاص يعتبرون سؤال سائق التاكسى (هتدفع كام) هو سؤال بجح، لكن وبشكل عقلانى هو سؤال يضمن (حقكوا انتوا الاتنين).

6 مش كل مرة تتقفش فيها مخالف هتتسحب منك الرخصه، وده أوبشن متاح فى مصر بس ، وعلشان رخصتك ماتتسحبش عندك كذا طريقة أشهرها أنت مش عارف أنت بتكلم مين لكنها مش دايما مضمونه وممكن تقلب بغم.

7 وأسهلها إستعطاف أمين الشرطة و تبرير خطأك كطفل أمه قفشته بيعاكس بنت الجيران مع التأكيد على إنك مش هتعمل كده تانى و الإكثار من معلش و نهارك ابيض يا باشا.

8 و هناك الطريقة الأكثر فعالية وهى إنك تحط بين رخصة العربية ورخصة السواقة ورقة بعشرين.

9 بالمناسبة ممكن تاخد المخالفة عادى،ولمّا تروح تطلّع شهادة مخالفات تلغيها!.


10 معظم أصحاب السيارات الصيّع فى مصر معهم خريطة بها الاماكن (اللى ينفع تركن فيها صف تانى من غير ما تتكلبش، حيث أن الكلابشات ليست متوافرة فى كل الشوارع) .

11 لدينا أيضا ميزة أن للكلبشة مواعيد عمل رسمية نعرفها جميعا و تجعلك تركن سيارتك صف تانى أمام سنترال التحرير فى الثالثة صباحا وانت متطمن.

12 لدينا ميزة إنك ممكن تفتح الإشارة بالضغط على أمين الشرطة عن طريق الكلاكسات، فى الواقع لدينا ميزة أخرى أهم تدل على أننا نعيش أجواء ديمقراطية وهى أن الواقفون فى الإشارة لديهم الحق فى تحديد الوقت المقبول للوقوف فى الإشارة وعندما يتم تجاوز هذا الوقت تبدأ زفة الكلاكسات.

13 لدينا ميزة اخرى وهى إنك ممكن تشترى سارينة إسعاف و تركبها فى عربيتك، و ستساعدك كثيرا فى إختراق الزحام، لإن الناس يفسحون الطريق تلقائيا عند سماع السارينة (حتى لو ماشافوش فى المراية اى عربية إسعاف ).

14 لدينا أيضا ميزة الإلتصاق بسيارة إسعاف حقيقية (لو ماعندكش سارينة)، الإلتصاق بسيارة الإسعاف سيجعلك تصل أسرع ، احيانا تحدث مناوشات بين سائقى السيارات حول من يستحق أن يلتصق بالإسعاف، وهناك نوع من السائقين فى منتهى خفة الدم (بيعملوا نفسهم قرايب المريض اللى فى عربية الإسعاف).

15 لدينا ميزة لا نراها هى فى حد ذاتها ولكن نرى آثارها فى الشوارع بسهولة، ميزة الميكانيكية المهرة الذين يسمحون لسيارات عمرها الإفتراضى إنتهى منذ سنوات بعيدة أن تستمر على قيد الحياة وتنافس سيارات الألفية الجديدة فى شوارع القاهرة(يعنى فيه ميكانيكية ممكن يخلوا عربيتك تعيش خمسين سنه على الأقل)، القاهرة هى العاصمة الوحيدة التى سترى في شوارعها سيارات موديل أوائل الستينيات ((R 1100، وأوائل السبعينيات (فيات 124)،و نهاية السبعينيات (فيات 132)، وبداية الثمانينيات (الفيورا طبعا).، ناهيك –حلوه ناهيك دى- عن السيارات ابنة فترة الأربعينيات والتي أصبحت قطع تاريخية نراها على فترات فى شوارع الزمالك والمهندسين.

16 ممكن الناس تركب فى شنطة العربية الملاكي لو العربية مليانة ، وهو مشهد له وقع طريف على من يراه، وهناك من يركب إلى جوار سائق الميكروباص (على شمال السواق)،و هناك المقعد الامامى الذى يتسع احيانا لثلاثة اشخاص(اتنين جنب بعض وواحد على رجلهم شويه وعلى التابلوه شويه)،وهناك المجانين الذين يجلسون فوق شنطة السيارة وهى مسرعة،وهناك الموتوسيكل الذى يحمل اسرة كاملة، لدينا ميزة الناس اللى بتشيل بعض فى (الزنقة).

17 لدينا ميزة روح التعاطف المختلطة بالأمومة، يعنى لو ماشى بعربيتك و كاوتش عربيتك نايم شويه او نص نايم او حتى مهوّى،هتلاقى كل العربيات اللى بتعدى عليك بتهدى جنبك وكل اللى فيها بيشاورولك على الكاوتش ، وهناك من هم متأججى المشاعر الذين يطاردونك حتى يلحقون بك (و بيكسروا عليك علشان يلفتوا نظرك ....الفرده اللى ورا عايزه تتزود).

18 النقطه السابقة نفسها تتكرر لو كنت ماشى بعربيتك وفيه باب من ابواب العربية مش مقفول كويس.

19 النقطة السابقة نفسها تتكرر لو ماشى وغطا تنك البنزين مفتوح.



20 تابع لروح التعاطف والأمومة ،إذا كنت على كورنيش المعادى او الأتوستراد او الطريق الصحراوي ، ولاحظت أن السيارات القادمة فى الإتجاه المقابل كلها بدون استثناء (عمّاله تقلّب لك نور) ، ستعرف فورا (إنه فيه رادار أو لجنة رادار على الطريق) و أن تقليب النور ماهو إلا تحذير أمهاتى إنه (خُد بالك يا بنى و على مهلك).



21 من اجمل ما فى الشارع المصرى تلك الجمل التى نراها مكتوبة على السيارات بكافة الأنواع،وهى مليئة بالحكمة احيانا ( السعادة فى الرضا)، وبالوقاحة احيانا (صغير بس يحيّر)،و بخفة الدم أحيانا (المجروحين يمسكوا يمين)،و بالطيبة أحيانا (يا بركة دعاكى يا أمى)، و بالمياصة أحيانا(من حق الكبير يتدلع)،و بالغموض أحيانا (للكبار فقط).

22 من اجمل ما فى الشارع المصرى روح التعاون ، وتتجلى هذة الروح فى (ورطة الزق) ، فعندما تعطل سيارتك وتطلب من أقرب مجموعة أشخاص أن (يزقوك) سيستجيب لك الجميع فورا..ولكن لأي مدى؟، لأبعد مما تخيل، فالشخص الذي تورط فى أن يزقك لن يتخلى عنك حتى تدور سيارتك وتنطلق مسرعا ملوحا له بالشكر من شباك سيارتك، لكن من الوارد أن تستمر عملية الزق لمسافة طويلة تجعلك تشعر بالإحراج ،ومن الوارد أن تتوقف العربية مرة أخرى فتنزل من سيارتك وعلى وجهك ابتسامة بلهاء فتجد الأشخاص الذين قصدتهم من قليل يعودون إليك مرة اخرى و يواصلون عملية الزق لدرجة تجعلهم يبتعدون عن المكان الذى كانوا يقفون فيه بمسافة تحتاج لمواصلتين علشان يرجعوا لها ...بس الجميل فى مصر إنه مش مهم الناس دى مشيت معاك لحد فين المهم عربيتك تدور وتمشى وترحمهم من الورطة اللي حطوا نفسهم فيها.

23 الأظرف عندما يكون العطل اللى فى سيارتك من النوع الذى لايفلح معه الزق، هنا سيستمر الناس فى زقك إلى ان يفقدون الأمل تماما، وساعتها سيقترحون عليك أن (إحنا هنزقك على جنب وتركن عربيتك وتقفلها وتروح تجيب ميكانيكي) ، وقد تجد بينهم شخص لا يفهم فى الميكانيكا لكنه عاطفى جدا و سيفاجئك بطلب غريب (أفتح كده الكبوت).

24 روح التعاون والتعاطف لها أشكال كثيرة ،مثل أن يتعاون الناس فى عدل سيارة إتقلبت على الطريق ، تراهم بهمة عمال البناء ينظمون انفسهم ويوزعزن أدوارهم و يحددون التكنيك المناسب لعدل السيارة مع العد( 3،2،1) و (ميزه تخليك...زق زق ).

25 ولأن الله (بيقدّر و بيلطف)، قدرنا ان تمتلىء شوارعنا بالحفر العميقة و البالوعات المفتوحة، ولكن لطف الله يتجلى فى الروح المصرية التى تحشد العشرات لإنتشال السيارة من الحفرة.

26 لدينا عدد لا بأس به من الناس الذوق ذوق ذوق، مثل هذا الشخص الذى لايكتفى بإشارة يمين ولكنه يخرج لك ذراعه من الشباك احتياطى لتكون مش واخد بالك، و هناك الشخص الذى لا يكتفى بإشارة الإنتظار إذا اضطر إلى الوقوف لكنه يرفع لك يده أعلى من مستوى السيارة فى إشارة تحمل مزيجا من الشكر والتنبيه،وهناك الشخص الذى تضطره الميكروباصات لأن (يكسر عليك) فيضطر إلى أن يفض ماشى قدامك لمسافة ميتين متر وهو رافع إيده لك أسفا و إعتذارا، وهناك من يضطره الاستعجال لأن يقفل بعربيته عليك ويدخل الى محل ما وهو عينه على العربيات اللى قافل عليها و ما أن يراك تفتح باب سيارتك وقبل أن تمتعض تراه جاى جرى وعلى وجهه ابتسامه تجعلك تود أن تقول له (ياريت الناس اللى بتركن صف تانى كلها زيك كده)، يقول لك (آسف) فلا تملك إلا ان تقول له (ماحصلش حاجه).

27 هناك شبه إتفاق بين المصريين إنه مافيش مشاكل يعنى وأنت سايق لو تسرق الحته دى عكسى أو تخطفها مخالف أو (أنت مالكش دخله من الفتحه دى بس خش خش الوقت متأخر مش هتلاقى حد واقف...حد طبعا بمعنى أمين شرطة).

28 من حقك تعمل مطب قدام بيتك ، أو قدام المحل بتاعك أو المدرسة بتاعتك علشان تحس بالأمان ، و بناء المطب حق مكفول لأى مواطن ولا يحتاج لتصريحات ولا يكلفه أكثر من شيكارتين اسمنت.


29 من المميزات التى يمكنك الحصول عليها فى شوارع مصر فقط هى إنك من حقك تمنع أى حد يركن قدام المحل بتاعك أو الورشة بتاعتك ،معللا ذلك بأنه (ده باب رزق يا أستاذ) ، وهى حجه قوية ومقنعة طبعا.

30 من المميزات التى يمكن الحصول عليها فى الشارع المصرى هى إنك ممكن تحجز مكان لعربيتك تركن فيه، مجرد قائمين من الحديد الصدىء و سلسلة من نفس الخامه ، و تقوم بزرع القائمين فى أى مكان فى الشارع معلنا استيلائك عليه و لن يعترض احد، بالعكس سيقوم جيرانك بالبحث عن مكان يصلح لتحويله إلى باركنج مشابه للذى اخترعته.


31 مش من حقك تشد التعشيقه لو هتركن صف تانى، بس من حقك تركن صف تانى.


32 من المميزات الموجوده فى شوارع القاهرة فقط إنك لو اتزنقت ممكن تعمل بى بى فى أى حته ، وفيه ناس بتحب تفن وترسم أشكال على الحيطه اللى أعتبرها مبولة، (الحقيقة أى حيطة فى القاهرة تنفع مبولة حتى حيطان المتحف المصرى اللى فى التحرير).

33 كمان من المميزات اللى عندنا أن أى حيطه تنفع سبورة تكتب عليها اللى انت عايزه وده موجود من ايام الفراعنه، هناك من يكتبون أسمائهم للذكرى، وهناك من يرسمون قلوب منبعجه بأسهم وإسمه وإسم حبيبته( مجدى و رانيا)،وهناك من يكتبون إعلانات عن شقق للمغتربات بأرقام تليفون الشقق علشان لو حد عايز يظبط واحده مغتربة، وهناك من يكتبون شعارات عنتريه مثل (عفوا هذا زمن الأهلى)، وهناك من يكتفون بالشخبطه والرسم، وفى كل جدران العاصمة ستجد متنفسا لهؤلاء المكبوتين لا تملك إلا ان تعتبره ميزة تنفس عن البعض و تضحك البعض.

34من احلى الحاجات فى الشارع المصرى هو الحق المكتسب لصاحب الكشك فى استخدام ما يستطيع من المساحة المحيطة به، لو عندك كشك –وفى مصر فقط- تستطيع ان تضع كل بضاعتك بالخارج ،وهو يعنى حتة الكشك هيشيل إيه ولا إيه؟

35 لو عندك سوبر ماركت ممكن تزين بابه بصفين، صف علب سمنة روابى ،وصف كراتين برسيل،ومع إنها مجرد بضاعة إلا إن الناس بتعتبرها إيمدج للمحل، (مع إن المفروض إن البضاعة دى كلها تدى إنطباع بالكساد)!

36 من أحلى الحاجات فى الشارع المصرى ، إن المواطن المصري لو شاف خواجة فى الشارع يبتسم في وشه على طول وبشكل تلقائى...إلا لو كان خليجى وده موضوع تانى.

37 ممكن توقّف أى شخص فى الشارع وتطلب منه اى حاجه ومن النادر إنه يكسفك، ممكن تطلب أى حاجه من أى واحد ماشى فى الشارع و بيتكلم مصرى بداية من (ممكن تقرا لى العنوان اللى مكتوب فى الورقة)،مرورا ب(سيجارة)،نهاية ب(ممكن جنيه اروح بيه؟).

38 من أحلى الحاجات فى الشارع المصرى ،الطيبة اللى زرعها الله فى الوجه المصرى، نوع من الطيبة تزيدها قسوة الظروف جاذبية، طيبة يسهل إستكشافها إذا وضعت وجها مصريا بين وجوه من جنسيات مختلفة (المانى، قطرىن يابانى،مكسيكى).

39 من أحلى الحاجات فى الشارع المصرى ، أن الجميع يدعو لك فى مختلف الاحوال، يعنى إذا عطفت على شخص سيدعو لك (ربنا يزيدك)، وإذا ساعدت شخصا ما (ربنا يريح قلبك)،وإذا تعرضت لمكروه(ربنا يعوض عليك)، حتى لو قمت باستفزاز شخصا ما (ربنا يسهلّ لك)، وأحيانا إذا تسرعت و تعديت بقول جارح على شخص ما (ربنا يسامحك).

40 برغم السلعوة فإنك لا تستطيع أن تنكر حالة من الشعور بالأمان تسيطر على شوارعنا، و تذكر كم مرة نسيت سيارتك مفتوحة و توجهت للنوم لتجدها فى اليوم التالى كما هى، اللصوص عندنا-وهذة ميزة ايضا-لا يسرقون السيارات المفتوحة.

41 البلد لا تنام وتعمل 24 ساعة ، وهى واحدة من اهم مميزات الشارع المصرى ، فأنت تستطيع ان تشترى اى شىء فى أى وقت بداية من الدواء نهاية بالحشيش (اللى هو دواء برضه)،وأضف إلى القائمة خدمات علاجيه ومحلات السوبر ماركت و مطاعم ومحطات بنزين وبائعي صحف و عربيات فول و محلات عصير ومقاهى و اقسام شرطة و كباريهات لو عايز.

42 من أحلى ما فى الشارع المصرى إجتهاد معظم الشعب فى أن يكون خفيف الدم صاحب إفيه (وكل واحد ومقدرته طبعا)، لكن وجود هذة الروح فى الشارع المصرى يضمن الحد الادنى من القدرة على التفاهم و التواصل، ويمكنك ملاحظة هذا بسهولة فى الحوارات التى تنشب سريعا بين قائدى السيارات المتوقفة فى أى إشارة و بمرور الوقت يمتلىء الحوار بآراء ساخرة و إفيهات ذكية سريعة إلى أن (تخِّضر) الإشارة و تبدأ زفة الكلاكسات ( يا عمى أنت هترغى؟).

43 أتوبيسات النقل العام مصممة بحيث تستوعب أكبر كم ممكن من الركاب، ومن احلى الحاجات فى مصر قاعدة ركوب الاتوبيس التى تقول (مهما كان الأتوبيس مليان..دايما ليك مكان).

44 من احلى الحاجات فى الشارع المصرى أن أى شارع ممكن ان يتحول إلى ملعب كرة، وأنا اقصد كلمة أى شارع فعلا و تذكر الماتشات التى تقام أمام القصر الجمهورى فى عابدين.

45 من أحلى الحاجات أن محترفى كرة الشارع اخترعوا كره على قد الشارع (الكورة الشراب طبعا).

46 من أحلى الحاجات فى مصر إن أى حد ممكن ياخد لقب (باشمهندس) بسهولة، ماعدا الباش مهندس الحقيقي فالناس تناديه ب (يا دكتور).

47 بالرغم من أن خطوط عبور المشاة يندر احترامها ،فإنه كثيرا ما يحترم قائدو السيارات رغبة المشاة فى العبور من أماكن خطر و يتوقفون لهم تماما حتى يعبرون فى أمان.


48 لو وقعت فجأه فى الشارع هتلاقى الناس اتلمت حواليك ممكن مايعملوش حاجه مفيده قوى بس على الاقل هتلاقى حد يشيلك من الارض و يركنك على جنب،و (ميه...حد يجيب شوية ميه).

49 من أحلى الحاجات فى شوارع مصر ضحكة عسكرى المرور عندما تضحك فى وجهه او تلقى عليه تحية الصباح (صباح الفل).
بالمناسبة من المميزات ايضا إنك ممكن تدى عسكرى المرور الغلبان حاجه و تاخد عليها ثواب وماتعتبرش رشوة لأنه مابيعملش حاجه أصلا.


50 من أجمل الحاجات فى الشارع المصرى مشاهد لن تراها إلا فى شارع مصري، مشهد شاب يساعد سيدة مسنة أو رجلا اعمى فى عبور الشارع، مشهد صلاة الجمعة او العيد فى الشارع، مشهد بائع العرقسوس و بائع الربابة و بائع غزل البنات،الرجل الذى يحمل قفص الخبز فو رأسه يسنده بيد وبالأخرى يقود دراجته، مشهد تجمع العشرات حول عربية الفول فى الصباح الباكر (أحلى شوية أكل فى العالم كله أصلا)،مشهد المحل الذى تمر أمامه ليلا وتراه مغلقا ولكنك تسمع قادما من الداخل صوت إذاعة القرآن الكريم،مشهد السيدة البدينة بالجلباب الأسود تجرى خلف اتوبيس هيئة النقل العام،مشهد الباعة الجائلين وهم يحملون فرشة البضاعة و يهربون من شرطة المرافق،مشهد صبى القهوة وهو يضع مبسم الشيشه فى فمه و ينفخ فيه ليفرغ الشيشة من الماء على الاسفلت،مشهد أعلام الزمالك ترفرف من السيارات عندما يفوز الأهلي فى نهائي أفريقيا







=====================
........................................ ..
................................
...............
....
.

المواضيع المشابهه
الموضوع كاتب الموضوع المنتدى مشاركات آخر مشاركة
توضيح ميزه روعه وبسيطه في أكواد الـ copy , delete , move , find Haitham.2012 ورشة عمل اسطوانات تجميعات البرامج وشروحات ودروس برنامج الاوتوبلاي AutoPlay Media Studio 12 29-12-2015 04:53 AM
محشه برسيم وحصاده القمح والارز والذرة وقاطعه العشب al-sonbola مكائن وكسارات ومعدات صناعية وزراعية وتجهيزات مصانع 0 08-01-2013 04:00 PM
فيديو محشه برسيم وحصاده قمح وارز جديده al-sonbola صور - طرائف - الغاز - مسابقات - تسالي - مرح - نكت - فوازير 0 08-01-2013 03:56 PM
ميزه فى اوفيس 2003 لاتوجد فى 2010 egyptian hak صيانة الكمبيوتر وحلول الحاسب الألي - هاردوير 6 12-05-2010 05:06 PM
روابط من أجل العوده ... ميزه رائعه لتبادل المعلومات LinkBacks phenomenon تطوير المواقع 1 15-07-2008 08:46 PM
19-04-2010, 02:48 AM
raedms غير متصل
VIP
رقم العضوية: 81535
تاريخ التسجيل: May 2007
المشاركات: 23,957
إعجاب: 618
تلقى 4,106 إعجاب على 733 مشاركة
تلقى دعوات الى: 1330 موضوع
    #2  
مصر ام الدنيا
تسلم مصر وأهل مصر
بارك الله فيك


سبحان الله وبحمده سبحان الله العظيم


19-04-2010, 05:28 AM
اذكرالله غير متصل
عضوية الشرف
رقم العضوية: 327106
تاريخ التسجيل: Mar 2010
الإقامة: japan - italy
المشاركات: 1,972
إعجاب: 273
تلقى 530 إعجاب على 67 مشاركة
تلقى دعوات الى: 10 موضوع
    #3  
صراحة انا مصر زرتها مرة ورايت الهرم
لكن ساحتاج شهر بل اكثر لافهم ما مكتوب بالموضوع
شكرا


19-04-2010, 05:56 AM
That's Me غير متصل
الوسـام الماسـي
رقم العضوية: 100257
تاريخ التسجيل: Sep 2007
الإقامة: Egypt . EL Arish
المشاركات: 3,869
إعجاب: 1,141
تلقى 1,450 إعجاب على 195 مشاركة
تلقى دعوات الى: 2 موضوع
    #4  
نستنتج مما سبق ان مصر

بلد الطيبة والتعاطف والفطرة والتواضع والرحمه والذكاء المتناهي
والثقة بالنفس وحب الاخرين والجميع ،،،


19-04-2010, 10:14 AM
Magic-M غير متصل
الوسـام الماسـي
رقم العضوية: 213304
تاريخ التسجيل: Jan 2009
الإقامة: EGYPT
المشاركات: 3,396
إعجاب: 1,365
تلقى 670 إعجاب على 101 مشاركة
تلقى دعوات الى: 517 موضوع
    #5  
و الله الموضوع كله عجبنى فعلا .. و على فكرة ..

أنا الشخص اللى كان بيزق العربية لحد ما خلاص مبقاش قادر ..

ومرة واتنين وتلاتة .. بس الحمد لله العربية دارت ...

و فى حاجة كمان أضحكتنى ..
إلى أن (تخِّضر) الإشارة و تبدأ زفة الكلاكسات ( يا عمى أنت هترغى؟).
حصل معايا الموقف ده بالظبط ... !!!

( على فكرة معنديش عربية ... ولا حتة موتوسيكل أو بسكلتة )

المصرين جدعان قوى فى حاجات كتيييييييييييير

وكلنا عايزين دمنا يبقي خفيف .. حتى لو دمك مش خفيف

بس برضو بتحاول ... عشان الدنيا تمشي

تحياتى ( أول مرة أقرا موضوع بالحجم ده )

خلقى ديق ومش بحب أقرا كتير ... ( ومش هتلاقي حد بيكتب ضيق بالـ ( د ) أبدا .. )

بس دى مصر


19-04-2010, 02:08 PM
أبو دنيا وعصام غير متصل
عضو مميز
رقم العضوية: 124809
تاريخ التسجيل: May 2008
المشاركات: 371
إعجاب: 15
تلقى 56 إعجاب على 21 مشاركة
تلقى دعوات الى: 1 موضوع
    #6  
اليوم وفى هذه الساعة وأنا ذاهب إلى عمل زوجتى لأخذها بالموتسيكل لأن عملها يبعد مسافة بعيدة عن المنزل والمواصلات صعبة جداً
وأنا أما الشغل كانت هنا ست كبيرة فى السن جداً جالسة فى الشارع تنادى على أى واحد يحمل عنها أشياء
والله تركت زوجتى فى الشارع وجعلت زوجتى تحمل الأشياء وتضعها على الموتسكيل ولكن كان هنا ناس فى الشارع قاموا بدل بهذا العمل بدل منى حتى أخذ زوجتى ولا أتركها فى الشارع ..
المهم
الشعب المصرى ... شعب أصيل ... يتمسك بالعادات والتقاليد
ولكن
الإعلام المصرى والتدخل الغربى ... كان له أثر على بعض الناس وبعض الشباب


19-04-2010, 08:00 PM
moseba غير متصل
الوسـام الماسـي
رقم العضوية: 164154
تاريخ التسجيل: Sep 2008
الإقامة: DamasGate
المشاركات: 5,149
إعجاب: 1,525
تلقى 977 إعجاب على 185 مشاركة
تلقى دعوات الى: 7 موضوع
    #7  
والله فعلاً مصر هى أم الدنيا
وهى بلد الطيبة والتعاون
تسلملى يا محمود على الموضوع الرائع جداً
ومهما تكلمنا لن نقدر أن نصف كل ما بمصر من مزايا وجماليات
وهذة هى الحقيقة
وفعلاً مهما سافرت وأغتربت عن مصر
سوف تشعر بشئ غريب يشدك إليها مرة أخرى
ومصر هى الوحيدة التى تتميز بتسمية محلاتها بأسامى غريبة
مثل
سلسلة محلات الجحش والدمياطى التابعى
ومحلات الغول ومحل (ماما غدينا وبابا غدينا)
وأشياء كثيرة


19-04-2010, 10:03 PM
Magic-M غير متصل
الوسـام الماسـي
رقم العضوية: 213304
تاريخ التسجيل: Jan 2009
الإقامة: EGYPT
المشاركات: 3,396
إعجاب: 1,365
تلقى 670 إعجاب على 101 مشاركة
تلقى دعوات الى: 517 موضوع
    #8  
صح يا ميسو ... بس الموضوع ده لم يشمل سوى .. العربيات وبس ..

تخيل بقي لو اتكلم على باقى الحاجات الحلوة اللى عندنا

هياخد كاااااااااااام صفحة

آه على فكرة .. عندنا فى اسكندرية فى أسماء محلات كتييييير غريبة

مثلا ..
أنا ميدو . أنا ميشو . كشري الحرافيش . عصائر كراعى . قهوة أنح ( راس التين )
خردوات القرن العشرين . البطيخى . البحطيطى . "وهكذا للأدوات المنزلية" ..

بس دي برضو نوع من التغيير .. وكمان جذب الأنتباه

تحياتى

19-04-2010, 10:19 PM
moseba غير متصل
الوسـام الماسـي
رقم العضوية: 164154
تاريخ التسجيل: Sep 2008
الإقامة: DamasGate
المشاركات: 5,149
إعجاب: 1,525
تلقى 977 إعجاب على 185 مشاركة
تلقى دعوات الى: 7 موضوع
    #9  
ههههههههههه
عندنا هنا فى القاهرة
المستهبلة وأخر العنقود
كشرى وحلوانى (الدكتور) (على فكرة الراجل ده جامد جدا عن تجربة منى)
وكشرى الصيدلى فى المنوفية


ودكتور عضمضم بتاع الزلابية موجود فى مرسى مطروح
فى المشير أحمد بدوى أمام فندق المشير


وطبعا مننساش أهم ميزة وهى إن روح التعاون المصرى موجودة فى كل وقت وكل مكان
وكل زمان







19-04-2010, 10:23 PM
MA7AMED IBRAHEM غير متصل
عضو محترف
رقم العضوية: 322909
تاريخ التسجيل: Jan 2010
الإقامة: egypt
المشاركات: 467
إعجاب: 586
تلقى 111 إعجاب على 15 مشاركة
تلقى دعوات الى: 3 موضوع
    #10  
وهى ديه بلدنا egy
واحلى حاجه ان فى مصر الدنيا ربيع فى ربيع
وشكرا يامعلم


20-04-2010, 01:20 AM
MAHMOED غير متصل
عضوية الشرف
رقم العضوية: 153278
تاريخ التسجيل: Aug 2008
الإقامة: فى كنف الاخوان
المشاركات: 5,019
إعجاب: 1,515
تلقى 2,132 إعجاب على 501 مشاركة
تلقى دعوات الى: 1744 موضوع
    #11  
المشاركة الأصلية كتبت بواسطة raedms 
مصر ام الدنيا
تسلم مصر وأهل مصر
بارك الله فيك
تسلم يا غالى على المرور
المشاركة الأصلية كتبت بواسطة اذكرالله 
صراحة انا مصر زرتها مرة ورايت الهرم
لكن ساحتاج شهر بل اكثر لافهم ما مكتوب بالموضوع
شكرا
يكفينى مرورك
وانت تشرف مصر فى اى وقت

20-04-2010, 01:23 AM
MAHMOED غير متصل
عضوية الشرف
رقم العضوية: 153278
تاريخ التسجيل: Aug 2008
الإقامة: فى كنف الاخوان
المشاركات: 5,019
إعجاب: 1,515
تلقى 2,132 إعجاب على 501 مشاركة
تلقى دعوات الى: 1744 موضوع
    #12  
المشاركة الأصلية كتبت بواسطة That's Me 
نستنتج مما سبق ان مصر

بلد الطيبة والتعاطف والفطرة والتواضع والرحمه والذكاء المتناهي
والثقة بالنفس وحب الاخرين والجميع ،،،
بارك الله فيك
نورت الموضوع
المشاركة الأصلية كتبت بواسطة Magic-M 
و الله الموضوع كله عجبنى فعلا .. و على فكرة ..

أنا الشخص اللى كان بيزق العربية لحد ما خلاص مبقاش قادر ..

ومرة واتنين وتلاتة .. بس الحمد لله العربية دارت ...

و فى حاجة كمان أضحكتنى ..

حصل معايا الموقف ده بالظبط ... !!!

( على فكرة معنديش عربية ... ولا حتة موتوسيكل أو بسكلتة )

المصرين جدعان قوى فى حاجات كتيييييييييييير

وكلنا عايزين دمنا يبقي خفيف .. حتى لو دمك مش خفيف

بس برضو بتحاول ... عشان الدنيا تمشي

تحياتى ( أول مرة أقرا موضوع بالحجم ده )

خلقى ديق ومش بحب أقرا كتير ... ( ومش هتلاقي حد بيكتب ضيق بالـ ( د ) أبدا .. )

بس دى مصر
اه ياماجك
\عمال تقول حصل معاى
وانت اصلا ما عندك حتى بسكلته
على العموم نورت
المشاركة الأصلية كتبت بواسطة أبو دنيا وعصام 
اليوم وفى هذه الساعة وأنا ذاهب إلى عمل زوجتى لأخذها بالموتسيكل لأن عملها يبعد مسافة بعيدة عن المنزل والمواصلات صعبة جداً
وأنا أما الشغل كانت هنا ست كبيرة فى السن جداً جالسة فى الشارع تنادى على أى واحد يحمل عنها أشياء
والله تركت زوجتى فى الشارع وجعلت زوجتى تحمل الأشياء وتضعها على الموتسكيل ولكن كان هنا ناس فى الشارع قاموا بدل بهذا العمل بدل منى حتى أخذ زوجتى ولا أتركها فى الشارع ..
المهم
الشعب المصرى ... شعب أصيل ... يتمسك بالعادات والتقاليد
ولكن
الإعلام المصرى والتدخل الغربى ... كان له أثر على بعض الناس وبعض الشباب
بارك الله فيك انت وزوجتك

20-04-2010, 01:24 AM
المطبعجى غير متصل
الوسـام الماسـي
رقم العضوية: 205092
تاريخ التسجيل: Jan 2009
الإقامة: مصر
المشاركات: 6,240
إعجاب: 2,257
تلقى 2,254 إعجاب على 350 مشاركة
تلقى دعوات الى: 148 موضوع
    #13  
والله انا بحبها بحلوها ومرها
ومقدرش أعيش في مكان تاني غيرها
واذا بعدت عنها أشتقلها بناسها وأهلها

خالص تحياتي


20-04-2010, 01:26 AM
MAHMOED غير متصل
عضوية الشرف
رقم العضوية: 153278
تاريخ التسجيل: Aug 2008
الإقامة: فى كنف الاخوان
المشاركات: 5,019
إعجاب: 1,515
تلقى 2,132 إعجاب على 501 مشاركة
تلقى دعوات الى: 1744 موضوع
    #14  
المشاركة الأصلية كتبت بواسطة moseba 
والله فعلاً مصر هى أم الدنيا
وهى بلد الطيبة والتعاون
تسلملى يا محمود على الموضوع الرائع جداً
ومهما تكلمنا لن نقدر أن نصف كل ما بمصر من مزايا وجماليات
وهذة هى الحقيقة
وفعلاً مهما سافرت وأغتربت عن مصر
سوف تشعر بشئ غريب يشدك إليها مرة أخرى
ومصر هى الوحيدة التى تتميز بتسمية محلاتها بأسامى غريبة
مثل
سلسلة محلات الجحش والدمياطى التابعى
ومحلات الغول ومحل (ماما غدينا وبابا غدينا)
وأشياء كثيرة
بارك الله فيك ياميسوووووووووووو

الفاهره منوره بالناس الحلوه ذيكم
المشاركة الأصلية كتبت بواسطة Magic-M 
صح يا ميسو ... بس الموضوع ده لم يشمل سوى .. العربيات وبس ..

تخيل بقي لو اتكلم على باقى الحاجات الحلوة اللى عندنا

هياخد كاااااااااااام صفحة

آه على فكرة .. عندنا فى اسكندرية فى أسماء محلات كتييييير غريبة

مثلا ..
أنا ميدو . أنا ميشو . كشري الحرافيش . عصائر كراعى . قهوة أنح ( راس التين )
خردوات القرن العشرين . البطيخى . البحطيطى . "وهكذا للأدوات المنزلية" ..

بس دي برضو نوع من التغيير .. وكمان جذب الأنتباه

تحياتى
مره اخرى تحياتى لك ماجك
المشاركة الأصلية كتبت بواسطة hahadodo 
وهى ديه بلدنا egy
واحلى حاجه ان فى مصر الدنيا ربيع فى ربيع
وشكرا يامعلم
ميه مسا يمعلم



جزاكم الله خيرا

20-04-2010, 01:34 AM
MAHMOED غير متصل
عضوية الشرف
رقم العضوية: 153278
تاريخ التسجيل: Aug 2008
الإقامة: فى كنف الاخوان
المشاركات: 5,019
إعجاب: 1,515
تلقى 2,132 إعجاب على 501 مشاركة
تلقى دعوات الى: 1744 موضوع
    #15  
المشاركة الأصلية كتبت بواسطة المطبعجى 
والله انا بحبها بحلوها ومرها
ومقدرش أعيش في مكان تاني غيرها
واذا بعدت عنها أشتقلها بناسها وأهلها

خالص تحياتي
كنت مستنيك يا غالى

بارك الله فيك

 


50 ميزه تخليك تحب مصر

English

Powered by vBulletin® Version
Copyright ©2000 - 2017, Jelsoft Enterprises Ltd.
The owner and operator of the site is not responsible for the availability of, or any content provided.
Topics that are written in the site reflect the opinion of the author.
جميع ما يُطرح من مواضيع ومشاركات تعبر عن رأي كاتبها ولا تعبر عن رأي مالك الموقع أو الإدارة بأي حال من الأحوال.