Mohamad355

عضو جديد
التسجيل
17/6/16
المشاركات
4
الإعجابات
4
#1
'',

في البدايه احب أشكر كل القائمين عالمنتدى وخاصة الاستاذ جمال لسعة صدره ومساعدته لجميع الاعضاء والحقيقه اني استفدت كتير من المنتدى وبالأخص مستشارك القانوني واللي شجعني اني اروح اخلص من الموضوع ده رغم الاشاعات واللغط الكتير حواليه


أول حاجه انا كنت بدخل المنتدى اقرأ فيه بس مفكرتش اسجل بس سجلت مخصوص عشان احكي للناس تجربتي واشجعهم وعشان ده حق المنتدى عليا اللي ساعدني كتير في الموضوع ده و ان شاء الله انا مستعد لأي استفسارات بس ارجو من الناس محدش يسألني على سبب امتناعي عن التجنيد لأنه شبب شخصي وعائلي

تاني حاجه بدعي الناس انها تروح بنفسها وتسأل ولو خايف ابعت حد قريبك يسألك مع ان مفيش داعي للخوف ومتسمعش للاشاعات والكلام الهجص الكتير اللي بيتقال

نبدأ بسم الله

انا من المنصوره وبالتالي الكلام كله على منطقة التجنيد بالمنصوره القوانين هي هي في كل المناطق بس اللي بيختلف تعامل الموظفين وقناعاتهم الخاصه والشهاده لله اثناء عمل الفيش كان الناس في قسم الشرطه محترمين واثناء اجراءات التخلف كان الناس في منطقة تجنيد المنصوره قمه في الاحترام والذوق والتنظيم وكانوا صبورين جدا وبيجاوبوا على جميع الاسئله والمكان نضيف رغم انه محدوف شويه والوصول ليه مرهق

انا يوم التقديم كان سني 30 سنه و28 يوم وكنت اقدر اروح 30 سنه ويوم لأن القانون متغيرش بس ظروف الشغل وكده

أول خطوه بتروح تجيب الصحيف الجنائيه من القسم التابع ليه ولازم تكون البطاقه ساريه مهم جدا والفيش بتقدم عليه في يوم وبتستلمه تاني يوم ولو خايف يكون عليك حكم جنائي ممكن تبعت حد بالوصل يستلمه مكانك تاني يوم

بتروح القسم وبتبصم بجميع صوابعك على ماسح ضوئي وبيصورك وبيسأل الغرض من الفيش ايه بتقوله التجنيد والفيش تمنه 15 جنيه

ولو عرفت تطلع شهادة ميلاد كمبيوتر بالمره مش خساره اتسألت عليها مرتين مره في الاستعلامات ومره موظف التخلف بس عدوها عشان كده بقولكم قناعات موظفين

بعد ما بتستلم الفيش بتروح منطقة التجنيد انا روحت الساعه سبعه وموظف الاستعالامات وصل 8 ونص وقفت في طابور ولما وصلت لموظف الاستعالامات قولتله تخلف عن التجنيد قالي معاك شهادة ميلاد قولتله لأ قاللي هات الفيش وختمه استعالامات

دخلت بوابة المجمع فتشوني وسلمت الموبايل للأمانات

دخلت على موظف التخلفات بص في الورق (الفيش - البطاقه - صورتين للبطاقه ) قاللي فين شهادة الميلاد قولتله مش معايا سكت كده وقاللي ماشي وختم الفيش وقالي اطلع بره هاتلي ملف نيابه وملف ورق طلعت لقيت ورقه متعلقه فيه السنه اللي عليها الدور اللي عدت التلاتين سنه وده دليل ان القانون متغريش وفي حالتي السنه كانت 1986 والسنه الجايه هتبقى 1987 وهكذا

روحت الشباك قولتله عايز ملف نيابه وملف ورق ادالي ملف النيابه والملف الورق واخد 75 جنيه رجعت لموظف التخلفات اخد مني الورق وقالي استنى شويه شويه ونده عليا وقالي اروح الشئون القانونيه روحت لقيت محقق هناك اخد من الورق وفضل يكتب شوية حاجات وقالي عندك اي امراض قولتله لأ قالي امال مروحتش ليه قولتله السبب قاللي عندك اخوات اكبر منك جاوبته واداني ورقه فيها معاد المحاكمه يوم 26 -6 وقاللي خد معاك 6000 جنيه احتياطي

وانا بعد معاد المحاكمه هحكي اللي حصل ان شاء الله
 

Mohamad355

عضو جديد
التسجيل
17/6/16
المشاركات
4
الإعجابات
4
#2
كان فيه احد الاعضاء عامل موضوع بيسألني هل في جديد ولا لأ وللأسف معرفتش ارد عليه لأني مكملتش ١٠٠ مشاركه فهرد هنا عشان كمان الفايده تعم عالجميع
 

Mohamad355

عضو جديد
التسجيل
17/6/16
المشاركات
4
الإعجابات
4
#3
نبدأ بسم الله

انا روحت المحمكه العسكريه بالمنصوره يوم الاحد ٢٦/٦/٢٠١٥ بجوار المستشفى العسكري وجنب منطقة تجنيد المنصوره وكان فيه تنبيه جامد عالميعاد انك تبفى موجود الساعه ٩ بالثانيه فانا كنت موجود من تمانيه ونص قدام البوابه والبوابه اتفتحت الساعه ١٠ بعد الوقفه في الحر والتراب والقعده على الارض في الصيام وخصوصا ان المكان بيتعمل فيه كوبري علوي فكانت حاجه صعبه الصراحه

بعد الساعه ١٠ دخلنا من البوابه بعد ما فتشنا عسكري الشرطه العسكريه واخد منا البطايق الشخصيه وانتظرنا وصول القاضي واللي من الكلام ان رتبته عقيد

وصل سيادة العقيد الساعه ١ الضهر وبدأت الجلسه

وكان بينده عالأسماء وكان معانا ناس هربانه وناس ممتنعه وناس جالها استدعاء ومراحتش

الأسأله عباره عن النيابه بتتهمك انك تخلفت عن التجنيد او مروحتش الاستدعا ليه وطبعا كل واحد بيجاوب سواء بالكدب او بالحقيقه والراجل الصراحه محترم جدا وبيسمع بس المشكله انه كان متحفز شويه لأنه عارف ان ٩٩٪ من اللي قدامه بيكدبوا

زي واحد قاله انت بتشتغل ايه قاله صياد وسأله عن انواع سمك معرفش يرد راح قاله اصل هي في الورق صياد بس انا اساسا عامل زراعي فلاح يعني قاللي طب تعال قرب كده ووريني ايدك لقاها ناعمه وقاله انت ايدك انضف من ايدي واتلجلج قدامه والقاضي اتنرفز عليه واداله غرامه ٥٠٠٠ فلو انت هتكذب يبقى لازم كلامك يكون مقنع وتبقى عارف انت هتقول ايه واحد كمان كان بيدرس جراحه في كندا قاله انا كنت بدرس في كندا قاله فقاله يعني الدراسه في كندا اهم من التجنيد قاله والله دي فرصه وممنتش اقدر اضيعها قاله بتدفع مصاريف كام قاله منحه قاله منحة ايه قاله منحه وخلاص قالي طيب انا عايز اسيب الجبش وادرس جراحه اعمل ايه الولد اتلجلج والقاضي غرمه ٨٠٠٠ واحد تاني قاله بتشتغل ايه قاله مهندس اخد ٦٠٠٠ غرامه الغرامات كلها بعد كده من ٤٠٠٠ ل ٤٧٠٠ مفيش غير الحالتين بتوع ال ٥٠٠٠ وال ٨٠٠٠ وحاله تانيه لواحد ملتحي عنده ٤٣ سنه غرمه ٣٥٠٠ وانا اتغرمت ٤٥٠٠ ونايس كانت جتيبه محامين اخدوا ٤٧٠٠ وانا بقولك ملوش لازمه المحامي نهائي بالعكس القاضي كان قرفان من اللي معاه محامي ومن المحامي نفسه المهم بعد المحاكمه لما بتخلص بتروح الشرطه العسكريه تدفع هناك ولو مش معاك بيحتجزوك لحد ما تدفع يعني مفيش خروج الا بالدفع وبيكون هناك مندوب من البريد قاعد مستني لأن الفلوس بتتسدد حوالات عن طريق البريد وبياخدوا على ال ١٠٠٠ جنيه ١٤ جنيه مصاريف تحويل يعني انا دفعت ٤٥٠٠ اخدوا من ٤٥٦٥ وبعدين بتاخد وصلين لونهم اخضر وبتروح وقالولنا نجيب الوصلين دول وصورتين شخصيتين خلفيتهم بيضا يوم السبت اللي بعد الجاي ٩-٧-٢٠١٦ ونروح النيابه العسكريه في مشعل عشان نستلم بيهم الشهاده وفيه ناس قالت هنستلم صوره من الحكم ونروح منطقة التجنيد نطلع الشهاده وان شاء الله لما يبقى فيه جديد هقولكم
 

Mohamad355

عضو جديد
التسجيل
17/6/16
المشاركات
4
الإعجابات
4
#4
الحمد لله تم استلام الشهاده اليوم عقبال كل متعثر ان شاء الله

روحت مكتب النيابه العسكريه في ميدان مشعل كان معايا البطاقه وصورتين شخصيتين ووصولات دفع الغرامه وصلين سلمت البطاقه الشخصيه ووصلات الدفع اول ما وصلت وبصموني على صورة الحكم وشويه وندهوا علينا وسلموني صورة الحكم والبطاقه واخدوا ١٠ جنيه وقالولي روح على منطقة التجنيد ولما وصلت كالعاده تفتيش وتسليم الموبايل ودخلت المجمع روحت الشئون القانونيه أشرلي على صورة الحكم وخرجت للمماتب اللي بره جبت ملف ب ٢٢ جنيه ومليت البيانات وصورت البطاقه صورتين وبعدبن رجعت المجمع تاني وروحت لمكتب الدقهليه في نفس المكان اخد مني الملف والصوره الشخصيه وبصمني في الدفتر واخدت وصل استلام الشهاده قعدت شويه ندهوا علينا واستلامنا الشهادات ومكتوب فيها غير مطلوب للتجنيد نهائيا والشهاده اسمها نموذج للمتخلفين عن تأدية الخدمه العسكريه ومكتوب المذكور تخلف عن التجنيد وقيدت ضده القضيه رقم كذا جنح عسكريه المنصوره وتم اتخاذ كافة الاجراءات القانونيه حياله واصبح غير مطلوب للتجنيد نهائيا وعقبال كل متعثر يارب وده رقمي لأي مساعده 01007883544
 

angeliom

عضو جديد
التسجيل
25/5/17
المشاركات
1
الإعجابات
0
#5


اخواني وبارك الله فيكم عالمجهود الرائع من القائمين على النتدى وفعلا بنستفاد من خبراتكم .وكل عام وحضراتكم بخير بمناسبة شهر رمضان المبارك اعاده الله على الامة الاسلامية بالخير والبركات .
كان عندي استفسار انا حاليا بالخارج وتجاوزت الثلاثون عاما وانهيت موقفي من المحلق العسكري بخطاب اني قمت بتسديد الغرامة لحين انهاء الموقف من ارض الوطن او قدوم اللجنة العسكرية .واللجنة لم تاتي هذه السنة وخايف انزل مصر انهي الاجراءات المواعيد والطلبات تطول وانا مرتبط باجازة شهرين هل من الممكن انهي واخلص ولا بتطول الاجراءات وايه الاوراق المطلوبة لان البطاقة الشخصية منتهية وسيتطلب تجديدها . بارك الله فيكم اللي عنده معلومة اكيدة ويقدر يفيدني ويساعدني جزاكم الله خير علما اني تحدثت مع الملحق العسكري واكد لي ان هذه الاجراءات والمحاكمة لن تاخذ سوى شهر بالكثير
وفقككم الله لما يحبه ويرضاه وسدد على طريق الخير خطاكم وشكرا جزيلا .
 

أعلى