no.name

عضو مشارك
#1
'',



عمرى الان 25 سنة و6 شهور وقدمت فى الجيش ودخلت الجيش بالفعل ورحت مركز تدريب الشرطة العسكرية وبعدين اترحلت الى مركز 6 سائقين علشان اخد فرقة سواقة ورجعت تانى مركز تدريب الشرطة العسكرية وبعدين اتوزعت على س 67 شرطة عسكرية فى بنى سويف وصلت هناك تقريبا الساعة الثامنة ليلا وبعديت عملو تمام علينا وتانى يوم الظهر الساعة تقربا 3 بعد الظهر هربت من الوحدة بتاعتى من فوق السور بتاع الوحدة

انا دفعة 6/4/2009 ومدتى سنتان المفروض اخلص 1/6/2011 انا هربت تقريبا بعد ثلاث شهور تقريبا فى شهر 7 /2009

سبب هروبى من الجيش علشان ادخل كلية الهندسة والحمد لله دخلتها بالفعل وانا فى اول ايام جيشى قدمت على طلب بالموافقة علشان ادخل الكلية وادرس وانا فى الجيش ولاكن الطلب اترفض وعملت محاولات كثيرة لاكن لايوجد غير الرفض المهم قررت انى اهرب لان كلية الهندسة كلية عملية ولازم نسبة الحضور لا تقل عن 75% وعاوزة مجهود ومذاكرة كتير وبصراحة طول عمرى بتمنى انى اكون مهندس وكانت النية ان بعد ما اخلص الكلية ارجع تانى اشوف جيشى حتى لو كان 4 سنين مش سنتين

وانا دلوقتى فى اخر سنة فى الكلية ومش قادر اخد الشهادة الا لما اجيب موقفى النهائى من الجيش ودى كانت مفجاه بالنسبالى ومكنتش عامل حسابها ولا كنت اعرف انى شهادة الجيش مطلوبة للكلية علشان اخلص واخد الشهادة
واتفصلت من الكلية فصل تجنيدى مؤقت واقفة معايا على شهادة الجيش

انا قررت بعد تفكير انى اسلم نفسى بصراحة انا ادمرت ولو مكنتش هربت مكنتش عرفت ادخل الكلية قدر الله ومشاء فعل والحمد لله على كل شىء

روحت وسالت فى الشرطة العسكرية القريبة من سكنى وسالت فى النيابة العسكرية اية موقفى دلوقتى فى منهم اكدلى انى الحكم هيكون حبس ورفت من الخدمة علشان هارب بقالى سنين ودفعتى طلعت وخلصت وفى منهم قالى انى هاخد حكم بالحبس واعادة خدمة من جديد علشان ما قضتش نص المدة فى الجيش والحكم اللى هاخدة هيكون محسوب من الخددمة اللى انا هرجعالها ولو استنيت لحد الثلاثين هاخد حكم بالحبس مع ايقاف التنفيذ

وسالت محامى متخصص فى قضايا الهروب من الجيش قالى هاخد حكم بالحبس واعادة خدمة طالما سنى تحت الثلاثين
وقالى استنى لحد الثلاثين وهتاخد حكم بالحبس مع ايقاف التنفيذ ونصحنى ان استنى

وسالت محامى تانى قالى هاخد حكم بالحبس مع الرفت من الخدمة وبرضو نصحنى ان استنى لحد الثلاثين وقالى برضو بعد الثلاثين هاخد حكم بالحبس مع ايقاف التنفيذ

وانا بعمل فيش جنائى طلع فى الفيش الهروب من الخدمة العسكرية وكانت مفجاه بالنسبالى وكارثة كبيرة جدا

انا عارف ان لازم استنى لسن 36 سنة علشان تاريخ غيابى بعد 2004

برجاء التكرم والافادة بالاتى وبعد اذن الجميع الاجابة تكون صحيحة 100% ولا تكون محتملة او متوقعة وانا اسف انى بقول كدة بس الموضوع بالنسبالى اصعب ما يكون لانى متزوج ولا يوجد اى مصدر دخل للبيت فى حالة تسليم نفسى ولازم احسب ازاى اسرتى هتعيش لما اكون فى الحبس لانى هتصرف فى فلوس وهسيبها معاهم تكفيهم مصاريف لحد ما اخرج من الحبس

انا حبيت اقول بالتفصيل كل اللى حصل معايا علشان تكون الاجابة على اسالتى مؤكدة 100%


1 هل لو سلمت نفسى هيكون الحكم بالحبس فقط ولا حبس واعادة خدمة تانى

2 فى حالة لو الحكم بالحبس واعادة الخدمة هل مدة الحبس محسوبة من الخدمة + الثلاث شهور اللى انا خدمتهم

3 فى حالة لو الحكم بالحبس واعادة الخدمة هل دة علشان انا مقضتش نصف المدة فى الجيش وبعدين هربت ولا علشان عمرى تحت 30 سنة

4 لو الحكم بالحبس اقصى عقوبة كام سنة وادنى عقوبة كام سنة واية المدة المتوقعة فى الحكم بالنسبة لحالتى

5 كام عدد شهور سنة السجن بالنسبة لموقفى هل هى 9 شهور ولا 12 شهر

6 هل فعلا يوجد عفو بعد نصف المدة يعنى لو اتحكم عليا بسنتين هطلع بعد سنة او سنة وشهور قليلة جدا

7 لو فعلا يوجد عفو بعد نصف المدة وسنة السجن 9 شهور هيكون العفو بعد 9 شهور ولا 12 شهر

8 هل فعلا فى اكثر من عفو فى السنة يعنى عفو 6 اكتوبر وعفو العيد الكبير وعفو العيد الصغير وعفو عيد تحرير سيناء

9 لو فى عفو بعد نص المدة هل بيكون اقرب عفو يعنى لو بعد نصف المدة بايام فى عفو مثلا العيد الصغير وبعد كدة عفو العيد الكبير هلى ينطبق انهى عفو فيهم الاقرب ولا ليها حسبة تانية

10 هل الحبس هيكون فى الوحدة ولا فى السجن الحربى ولا فى السجن المدنى

11 لو الحبس فى السجن الحربى هل بعدة مدة معينة بترحل الى السجن المدنى او اللى انا تابع لية لو الاجابة بنعم لماذا

12 لو الحبس فى السجن المدنى هيكون فين السجن الاقرب لمحل سكنى ولا الاقرب للوحدة بتاعتى ولا هيكون فين

13 لو كان الحبس فى سجن حربى سيكون فى انهى سجن حربى الاقرب للوحدة بتاعتى ولا الاقرب لمحل سكنى ولا فى سجن مخصوص للهاربين ولا لايوجد لها معيار

14 هل العفو بعد نصف المدة لابد ان يكون بشروط ولا العفو يكون على جميع المحبوسين بدون شروط

15 اية الفرق بين الحبس والسجن

16 لما اخلص مدة الحبس بتاعتى واخد الشهادة طبعا هتكون رديئة هل ممكن اغيرها لدرجة افضل وبعد كام من الوقت وهل ممكن بعد ما اغيرها الى جيدة ممكن بعد مدة تانية من الوقت اغيرها الى جيدة جدا ولا اكتر حاجة ممكن اعملها انها تكون جيدة بس

17 هل يوجد رد اعتبار بعد لما اخلص مدة الحبس وما هى فائدتة

18 ظهور الهروب من الخدمة العسكرية فى الفيش هل سينتهى بعد خروجى من الحبس على طول ولا هياخد وقت وهل يوجد عقبات فى ذلك

19 بعد خروجى من الحبس وبعد حصولى على الشهادة هل يذكر فى الشهادة انى كنت محبوس او مسجون يعنى كلمة محبوس او مسجن تكون مكتوبة فى الشهادة

20 هل الشهادة هتكون شهادة تادية خدمة ولا هتكون شهادة عقوبة ولا اية نصها بالظبط

21 هل يوجد شغل فى السجون للمحبوسين بمرتب حتى لو كان 100 جنية فى الشهر لانى سمعت انى ممكن تشتغل وانت فى السجن

22 ممكن اقدم على التماس ان لايوجد اى دخل لاسرتى وانا فى السجن وهل لو فية ممكن يفيد باية بالظبط

23 ممكن اقدم طلب بتكملة اخر سنة فى دراستى وبعد كدة ارجع السجن تانى

24 ازاى اقدر افيد نفسى وانا فى السجن ينفع حد يجبلى كتب وورق علشان اذاكر وانا فى السجن

25 هل بيتم اخبار الاهل بانى محبوس او لو كنت مريض فى السجن هل بيتم اخبار اهلى بانى مريض او فى مستشفى تابع للسجن

26 هل يوجد معاملة خاصة للهاربين سواء كانت معاملة سيئة او معاملة كويسة

27 ارجو النصيحة من كل الاعضاء الكرام اسلم نفسى ولا استنى ولا اعمل اية

28 بالله عليكم ادعولى بشدة انا وجميع المسلمين انا بحاجة الى الدعاء



انا اسف على الاطالة وكثرة الاسئلة وارجو التكرم بالرد اليقين والاكيد لانى والله والله والله هستلف مبلغ كبير من المال علشان اسية مع اسرتى علشان يقدرو يعيشوا طول ما انا فى فترة الحبس لانة لا يوجد اى مصدر دخل للبيت اطلاقا بمعنى الكلمة وربنا اعلم بحالى المالى والنفسى وفى الاخر بقول قدر الله وماشاء فعل ولا حول ولا قوة الا بالله العلى العظيم وبحمد ربنا على كل شيء
وجزاكم الله كل خير

 

Hany Adel

Hany Adel

محامى ومستشار قانوني
#2
اهلا بك

لن نخوض في الماضي فلكل انسان ظروفه وحساباته

باختصار

طالما كنت تحت الثلاثين فأنت معرض للحبس واعادة الخدمة او استكمالها حسب قرار المحكمة العسكرية
لن تنتظر حتى الثلاثين
بل طبقا للنظام حاليا حتى 36 سنة
بالاضافة
ان تصل السجلات العسكرية الى دفعتك

يجب ان يتحقق الشرطين

امامك الان حلين :-
1-التقدم للمحاكمة وطلب الرأفة والاستعانة بمحام يفضل ان كان قاضي عسكري سابق عله يخفف الحكم.
وفي هذه الحاالة محاكمة .. وحبس مؤكد حسب قرار المحكمة + اعادة خدمة. وتنظم ..في الخدمة وتتحمل السنتين
بالطول والعرض حتى تنهي المسألة وتسير في مستقبلك المهني.

2-الانتظار 11 سنة حتى تصل للسن التي تسمح للهاربين من الخدمة بانهاء مشكلتهم .

كلاهما صعب وعليك الاختيار

فرج الله كربك وكربنا جميعا
 

no.name

عضو مشارك
#3
جزاك الله كل خير سيادة المستشار

استفسار اخر لو سمحتلى
لو انتظرت حتى سن الثلاثين من عمرى هل هيكون الحكم بالحبس و اعادة خدمة ولا بالحبس فقط

وهل ممكن بعد سن الثلاثين الحكم بالحبس مع ايقاف التنفيذ
 
new_yasser

new_yasser

عضو مميز
#4
نقاطك كثيرة جدا يا باشمهندس ...... لكن كما قال لك الأستاذ عادل عليك بأحد الحلين وأنا أنصح بالأول حتى تستطيه إنهاء موقفك والحصول على شهادتك
 

no.name

عضو مشارك
#5


انا عارف والله ان الاسئلة كتيرة اوى بس والله عاوز احسبها صح من جميع الاتجاهات قبل ما اسلم نفسى لان وضعى صعب جدا جدا وعاوز اعمل حسابى فى كل حاجة علشان مرجعش اندم تانى

انا خايف يكون الحكم بالحبس واعادة الخدمة من جديد هتبقى كارثة بالنسبالى المشكلة عندى دلوقتى مش فى انى اكون فى الجيش المشكلة انا لو فى اعادة خدمة لقدر الله هيضيع من عمرى لايقل عن ثلاث سنوات اسرتى هتعيش ازاى بدون اى مصاريف هى دى مشكلتى والله انا لو قادر ادبر امورى معنديش اى مشكلة انى اخدم 5 سنين مش سنتين يااااااااااااااااااااااارب افرجها على المسلمين جميعا حتى الان مش قادر احدد اسلم نفسى ولا استنى وخايف جدا اغلط تانى
 

احمد رضا احمد

الوسـام الماسـي
#6
اخى العزيز
الجيش هوة اكبر عقبة فى حياة كل انسان
بس غلطتك من الاول ان انت ما رحتش الجيش انا دلوقتى سنى 18 سنة
وبشوف وبجهز ورق الجيش علشان ابداء جيشيى فى السن المناسب
وبعد كدة ابدا حياة جديدة ان شاء الله ربنا يوفقنى
وان شاء الله ربنا ها يوفقك انت وكل الى فى زنقة
ربنا ما يوقعش اى حد فى زنقة باذن الله تعالى
على العموم دة بيبقى قدر ومكتوب
والى مكتبولك هاتشوف هاتشوفو ودى ما فهاش اى اعتراض
لان دى حاجة بتاعة ربنا وربنا الى رايد كدة
ربنا بيديلنا الحاجة الحلوة وبيرجع يعوضنا بالى احسن منها
بس ربنا ان شاء الله ها يقف جنب كل واحد
قول يا رب وخد قرار وان شاء الله الى فية الخير ها يقدمو ربنا
بس ان شاء الله تعالى خير
عشمان فى ربنا بالخير والسعادة لكل ان سان
ربنا معاك ويكرمك وان شاء الله طريقك على الخير باذن الله تعالى .
 

no.name

عضو مشارك
#7
شكر ليك يا استاذ احمد وربنا يوفقك ويكرمك
 

gamal gamal

محامى ومستشار قانوني
#8
عليكم السلام

بالطبع لن يسمح الوقت لى لأن أجيب عن هذه الأسئلة
بالتفصيل ... ولكن أجمل الإجابة على النحو المفيد والعملى

أولا كقاعدة ::: اذا كانت دفعنك ما والت فى الخدمة فساعتها يمكن الكلام
على الحكم بإعادتك الى الخدمة ......
وفى حالتك دفعتك انتهت من التجنيد منذ فترة بعيدة وعليه سيكون الحكم
بالحبس فقط ..............

وساعتها لن يفرق الأمر كثيرا أن تسلم نفسك قبل الثلاثين أو بعده
لأن هذا الأمر خاص فقط بالمتخلف عن التجنيد ...
( اذا كان قبل الثلاثين فالهدمة وبعد الثلاثين فالمحاكمة )
وليس المتهرب .

باقى الأمور مترتبة على ما سبق ولم أدهل فى تفاصيلها لأنها تختلف
من حالة الى أخرى وطبقا لظروف البلد ................
 

no.name

عضو مشارك
#9
الف شكر لحضرتك سيادة المستشار السيد الجمل على ردك

والحمد لله حضرتك طمنتنى بان الحكم هيكون حبس فقط ...... بدون اعادة خدمة

وجزاك الله كل خير
 

no.name

عضو مشارك
#10
استفسار اخر انا اسف على الاطالة هل فى فعلا عفو بعد نصف المدة

وسنة السجن كام شهر

انا عملت فيش وطلع فيه انى هارب من الخدمة العسكرية وفى قضية ينفع استعلم عنها​
 

Mahmoud Morsy

عضو مشارك
#12
الله يكون في عونك ياخي وان شاء الله ربنا كريم, توكل علي الله وكله خير, مهما هيحصل هوا تنفيذ لأرادة الله, اطمن وسيبها علي الله.
 

gamal gamal

محامى ومستشار قانوني
#13
العفو لا تبنى عليه لأنه ممكن يكون
أو لا يكون .........

والسنة هى سنة كاملة فى المحاكمات
والعفو يجعلها نصف المدة أو ثلاثة أرباع المدة ...
 

no.name

عضو مشارك
#14
الله يكون في عونك ياخي وان شاء الله ربنا كريم, توكل علي الله وكله خير, مهما هيحصل هوا تنفيذ لأرادة الله, اطمن وسيبها علي الله.


جزاك الله كل خير استاذ محمود مرسى وشكرا لرد حضرتك​
 

ويلاا

عضو مشارك
#15
على فكره يا استاذى الفاضل المفروض انى الفيش الجنائى مش بيبان فيه موقفك من التجنيد وشكراااااا
 

ويلاا

عضو مشارك
#16
المفروض انى الفيش الجنائى بتعمله من ضمن الاوراق المطلوبه لو هتخلص موقفك من التجنيد لو سنك 36 سنه ازاى هتعمله وانت اصلا موجود فيه عامل غيان عن التجنيد الفيش الجنائى مش بيبان فيه موقفك من التجنيد وشكراااا
 

no.name

عضو مشارك
#17
اخى الفاضل

انا فعلا روحت علشان اعمل فيش اكتر من ثلاث مرات وكل مرة اروح علشان استلم الفيش الموظف يقولى الفيش بتاعك مش موجود ويسالنى انت عليك حاجة اقوله لا معنديش اى احكام ولا اى قواضى نهائيا يقولى طيب تعالى كمان يومين يمكن يكون فى تاخير اوى اى سبب

اروح تانى فى الميعاد بردو الفيش مش موجود عملت واحد تانى نفس الموضوع بردو مش موجود مع العلم انى عملت الفيش مستعجل كمبيوتر وعادى عملت النوعين وبردو مافيش فايدة خالص

الغريب بقى فى الموضوع انى روحت البحث الجنائى وعملت كشف على اسمى بالبطاقة على الكمبيوتر مافيش عندى اى حاجة والموظف هناك قالى مافيش عليك اى حاجة اطلاقا

روحت قسم الادلة الجنائية وبردو بحثت على اسمى بالبطاقة الموظف قالى مافيش عليك اى حاجة نهائيا

روحت قسم تنفيذ الاحكام والموظف دور فى الدفاتر اللى عنده مافيش اى حاجة عندى اطلاقا

رجعت لقسم الفيش تانى بتاع الكمبيوتر وكلمت الموظف على الفيش ان كل ما بطلع فيش مايكنش موجود خد منى وصل الفيش ودخل على الكمبيوتر اللى بيعمل علية الفيش للناس وبعدين قالى الفيش بتاعك مطابع سالتو يعنى اية مطابع قالى يعنى عليك حاجة قلت اية هى الحاجة اللى عندى طلع كود من على الكمبيوتر ودخل بية على كمبيوتر تانى وظهر عنده جندى هارب من الخدمة العسكرية فى 2009 ودة فعلا كلام مظبوط انا فعلا هارب وفى 2009 الغريب بقى انه قالى مقدرش اطبعهولك ولا هتقدر تستلم الفيش

طلعت على البحث الجنائى تانى بس قسم الفيش دخلت للظابط اللى هناك وبعدين بعت معايا عسكرى لمكتب الكمبيوتر الرئيسى بتاع الفيش الموظف سألنى فين وصل الفيش وفتح دفتر اسمه الاشارة ولاقيت اسمى فى الدفتر دة ومكتوب بالنص

رقم الفيش وتارييخ عمل الفيش ومكان عمل الفيش واسمى بالكامل وكود الفيش
ومكتوب يمنع اصدار هذة الصحيفة
ومكتوب تحت المطلوب : جندى هارب

الموظف بيقولى انت كنت محبوس فى الجيش قلتلو لا انا عمرى ما اتحبست ولا فى الجيش ولا بره الجيش
استغرب جدا واتريق وقالى مستحيل انى اصدق كلامك وانا فعلا عمرى ما اتحبست ولا بره ولا جوه سالنى طيب انت هارب من الجيش بصراحة ان خفت قلتلو لا انا خدمت الجيش ومعايا الشهادة ومعايا جواز السفر وسافرت بره كمان قالى فين الشهادة قلتلو فى البيت قالى خدها وروح العباسية مش فاكر اروح فين بالظبط وخلص موضوعك وبعدين

دخل على الكمبيوتر وقالى اسمك موجود هنا مطابع لانك هارب من الجيش ومينفعش يطلع الفيش

وقالى كمان المفروض ان ناخدك ونسلمك حلا بس طالما انت خدمت الجيش ومعاك الشهادة روح بيها العباسية وربنا سترها معايا والحمد لله مع ان اكتر من واحد حظرنى من انى اروح البحث الجنائى دة لان لو فى اية حاجة هتسلم فورا بس انا غامرت والحمد لله ربنا سترها

المهم ان الفيش ظهر فية انى هارب من الجيش معرفش ازاى

روحت الشرطة العسكرية اللى عندنا وكلمت العسكرى عن موضوع الفيش قالى ازاى ظهر عندك فى الفيش وقالى طيب خلاص اعملى 2 فيش وكمل الورق بتاعك ولو معرفتش تتطلع الفيش تعالى من غيرة واحنا هنعملهولك
 

Max Pain

عضو مشارك
#18
الله يفرج كربك وكربي وجميع المسلمين يارب انا رايي انك تستني لسن 30 وتاخد الحكم معه ايقاف التنفيذ ارحملك لان الحبس العسكري سيء تماما ربما ما يكتبه عليك وممكن تشتغل مؤقتا طول ال 5 سنين دول لحد ما تكمل ال 30 عشان تصرف علي اسرتك احسن ما تخش الحبس ويفضلوا بدون عائل مدة سنتين ربنا يفك كربك يا اخي
 

أعلى