عمر ابو الليل

الوسـام الذهبي
#1

------------------------------------------

سيدة تبيع شبت وبقدونس على ظهر قفص مقلوب على اﻷرض.. وجهها به منحنيات من آثار تعرضها للشمس.. كنت انتظر صديقى في السيارة بجوارها وسمعت هذا الحوار بينها وبين بائعة أخرى.

-الواد سابلي البيت وهج.. عايز حنفية فلوس.. عشان قلتله يابني بقالي 4 شهور ماجبتش الدواء.. عايزة اجيبه مرة قبل ما اتكوم جنبك ونجوع إحنا اﻷثنين.. شوح فيا ومشي ومدخلش البيت بقاله 3 أيام..


-يا لهوي ياختي الواحد يربي ويكبر وفي الاخر يترمي.. ربنا معاكي يام عبده إن شاء الله بجيلك هيروح فين يعني..


المهم قررت انزل اشتري منها اي حاجة.. وأدردش.. سألتها: مش محتاجة حاجة يا أمي؟

قالتلي تسلم مستورة.. ورفضت تاخد أكتر من ثمن البقدونس.. اهو مافيش حاجة توجع قد واحد فقير وعفيف.. بس قلت هاحاول بردو..
قلتلها طيب يا حاجة أنا سمعتك وأنت بتتكلمي عن الدوا بصراحة وعايز اجيبهولك.. ممكن اسمه؟ بصت في اﻷرض.. مزيج من العفة والإحتياج والفرحة والحياء.. ست عظيمة الحقيقة..

قالتلي والنبي يا بنى ماعرف اسمه هو دواء السكر ب22.5 وحبوبه صفراء كده..

قلت خلاص هاحاول اوصله.. رحت الصيدلية وسألت الدكتور هل في كذا كذا قالي يعني اسمه ايه؟ قلتله هو لست غالبا مابتعرفش تقرا فمتعرفش اسمه.. الدكتور فضل يدور على الكمبيوتر ووصله في الاخر.. وبدل علبتين لقيته مديلي شنطة فيها الدواء.. سألته كام؟

قاللي ده هدية مني ليها.. وقول لها أول مايخلص هتاخده عندي ببلاش.. ربنا يكرمك.. وكاتبلي كارت في ظهره يصرف لحامل هذا الكارت الدواء كذا بالمجان .

الست كانت بتبكي وهي ماسكة الدواء ابو 22.5!! والكارت!

هو ده المعنى الحقيقي لﻹحسان عارف لما تكون مش عارف تفرح بأم مكافحة ولا ست قنوعة وراضية ولا دكتور طيب جميل ولا بربك الكريم؟.. الخير موجود في البلد دي مهما كنا مش قادرين نشوف فيها غير الوحش
تفاءلوا واحسنوا
وتحية للصيادلة الصالحين

 

كمال بدر

كمال بدر

الوسـام الماسـي
#2

موضوع رائع ، يحتوى على معانى قيمة وجليلة للأسف مفقودة فى هذة الأيام إلا من رحم ربى.

جزاك الله خيرا أخى الكريم وجعلة الله فى ميزان حسناتك إن شاء الله ... تقبل تحياتى. .

 

شروق الامل

الوسـام الماسـي
#3
طرح جميل ورائع يحسسك فعلاً أنه الدنيا لسه بخير
بارك الله فيك أخى
 

جهاد ع

عضوية الشرف
#4
الخير بي وبأمتي الى يوم الدين

لا ينعدم الخير بين الناس وإن اصبحت الاغلبية العظمى منهم الى الأسوأ
جزاك الله خيرا اخي عمر
 
deyamag

deyamag

عضو ذهبي
#5
أبكيتني يا رجل .
صدقت الدنيا لسه بخير و كانت و ستظل .
 

raedms

الوسـام الماسـي
#6
جزاك الله خيرا اخي
 

أعلى