جمال عبد العزيز م

شُعراء البوابة
التسجيل
20/10/11
المشاركات
254
الإعجابات
91
الإقامة
مصر
#1
بطاقة ... شعب
خلاص يا شعب مش عايز....
.....تفوق تانى
بقيت واخد .. .. على الفرقة . ..
على الضلمة...
وعايش وسط احزانك....
ووحدانى ..
*****
صحيح يا مصر عجزتى
وشاب عمرك...
وضاع وقتك... مع الغربة
وقلبك لسه ف الماضى..
ومش راضى....
يروح .. بكرة
وخايف لو يسير .. خطوة
ويبعد مرة عن جرحك
ويبعد عل كان جارحك
ويحلم تانى بالعيشة
ويصنع لو جناح ريشة
يلون بيها أيامك
ويرسم بيها أحلامك
ويفرش بيها قدامك
امانيك.. وفرحة حبنا ليك
وبسمة فرحنا بيك
ويمسح من رموش عينك ... مآسيك
دموعك .. هم احزانك .. بلاويك
*****
صحيح يا شعب فرعونى
رضيت جارك يكون قبطى ...
يكون شيعى ...
يكون بوذى .. و صهيونى
ورافض لو تكون مسلم
من الإسلام ... بتتأفف
ومن ماضيك .. بتتعفف
مسلم بس لهمومك..
لأوهامك ...لآلامك
لقهر إتعود اللطمة ...على ضهرك
وجهل إتعود الصفعة ...على وجهك
وفقر إتعود الرُكبة ....على عيشتك
****
خلاص يا شعب مش هصرخ..
ويألمنى.. أشوف صورتك
على بطاقتك كتبت اسمك ..
بخط كبيييييير (انا محمد)
وعبد الله ... وتتمسلم
وجنب اسمك .. بتتأسلم
وعنوانك .. ما لكش مكان
وايه شغلك ؟؟
انا عاطل..
ونفسى يا دوب اكون عايش
ولو حتى أعيش عمرى على الباطل
وايه أملك ؟؟
ما ليش آمال
وتمشى دنيتى بيا .. ف أى مجال
وأيه هدفك؟؟
ما ليش اهداف
اموت .. أحيا .. ما فهش خلاف
يتيم اهلى
ومات جدى .. وقال عنه التاريخ موال
لكن عنى .. يا ريت ما قال
*****
خلاص يا شعب شاف نفسه ...
فى آخر الصف
و كل حضارة الماضى ... بقت ع الرف
وأكتر حاجة تبسطكم .. نقوش ع الكف
رضيت بالوقفة متلطم ... ف آخر الديل
وكل الناس بتتقدم....
وكل الناس بتتعلم
وكل الناس بقت عايشه ... و انت ذليل
*****
ولما الفرصة ترجعلك
وتملك دنيتك ... قدرك..
بتتفرعن... وتتقرعن..
وتحرق كل شيئ تحتك
وتهدم فرصتك .. أملك
*****
خلاص يا شعب .... متحرر..
ومتغرر ...
ومتثورج .. ومتهور
وراضى بوقعتك.. يائس بتتزمر
وراضى بخطة الشيطان ...
بتعبث فيك ..
وتلعب بيك
وأنا وحدى .. مع التايهين...
بنادى عليك
ولا سامع .. ولا شايف
ومن غلبى بقيت خايف
اكون ميت ..
بنادى في غربة العيشين
وتايه وسط ناس تايهين
دا لو ماتت نفوس .. ممكن..
ولو ماتت قلوب .. ممكن ..
لكن شعبى .. !! تراب ارضى ..!!
دى لو ماتت ..
اكون فعلا يتيم ميت.. مع الضيعين
*****
جمال نصير في 21/1/2013
 

أعلى