جمال عبد العزيز م

شُعراء البوابة
التسجيل
20/10/11
المشاركات
254
الإعجابات
91
الإقامة
مصر
#1
(( همي ))

نفسي اضحك .. تضحك الضحكة ف دموعي
تطلع الفرحة بترقص من ضلوعي
مش يادوب مرسومة صورة فوق شفافي
ضحكة صافية
و أرمى همي خلف ضهرى
بس همى .. مش سايبنى
فوقى راكب
زى ضلي .. ما يفارقني..

****
فى المراية
ألقى همي بين ملامحي
أدى ضهرى للمراية
ألقى همي خلف منى
لما أكل.. لما اشرب.. لما أمشى..
ألقى همي قبل منى
اجى البس
ألقى همي بين ملابسي
لما ارجع بيتي متعب
ألقى همي
فوق سريري
قال حاضني

****
لما اسرق من زماني لحظة حلوه
ألقى همي بيشاركنى
ادخل الحمام أشوفه
بين صوابعى.. تحت جلدي
اترك الدنيا الكبيرة
و أرمى نفسي ف ركن ضلمة
ألقى همي
طل م الضلمة يهاجمني

لما اهرب بين دموعي
ألقى همي تحت رمشي
لما أفكر .. أي فكرة
ألقى همي بيجادلنى
لما احلم
ألقى همي وسط حلمي

****
حاسس انه زي اسمي
لونه لونى
شكله شكلي
حته منه وهو منى

****
كل دا فى دنيتنا عادى
بس خوفي
لما ارحل دنيا تانيه
القى همى
فوق كتافى
جا يعاتبنى

****

جمال نصير
18/2/2008
 

أعلى