دورة فى الجافا؟!

Galileo · #1 (**permalink**) 13-06-2008, 09:54 PM

السلام عليكم ورحمة الله وبركاته

الاخوة الكرام

فكرت ان ابدأ "دورة" لشرح مبادئ البرمجة باستخدام الAlgorithm وتطبيقه على لغة البرمجة
Java
لتكون خير بداية لكل من يريد ان يتعلم البرمجة ..

ولكن بدلا من ان اضيع وقتى .. اريد ان ارى مدى التفاعل مع الدورة من قبل الاعضاء لأننى ببساطة "مش هاشرح لنفسى

"

فاذا اراد احد ان يتعلم البرمجة بطريقة سهلة ومدروسة علميا (تدرس فى اشهر وارقى الجامعات المصرية)
فليضع ردا بهذا الموضوع ..

بخصوص الدورة ،
لن يتم بداية الدورة قبل السادس والعشرين من شهر يونيو الحالى

والله ولى التوفيق

السلام عليكم

mzar720 · #2 (**permalink**) 14-06-2008, 12:05 AM

اخى الحبيب جلال اخبارك ايه ؟
كان نفسى اكون معك فى هذه الدورة المفيدة و لكن الوقت ما فيش., و ان شاء الله تجد تفاعل من الاخوة و خصوصا الاجازة بدات

khaled helal · #3 (**permalink**) 14-06-2008, 12:59 AM

واصل أخى الحبيب.....نحن معكـ......

Galileo · #4 (**permalink**) 14-06-2008, 03:11 PM

إقتباس:

المشاركة الأصلية بواسطة mzar720

اخى الحبيب جلال اخبارك ايه ؟
كان نفسى اكون معك فى هذه الدورة المفيدة و لكن الوقت ما فيش., و ان شاء الله تجد تفاعل من الاخوة و خصوصا الاجازة بدات

الحمد لله تمام انت فينك يا استاذنا مختفى فين وعامل ايه فى الكويت؟
كان نفسى تكون فى الدورة والله عشان عارفك وعارف انت ممكن تعمل ايه معايا بس خيرها فى غيرها ان شاء الله وربنا معاك .. انا ها post المقدمة وسير الدروس وعايز رأيك فيهم ان شاء الله

إقتباس:

المشاركة الأصلية بواسطة خالد هلال

واصل أخى الحبيب.....نحن معكـ......

ان شاء الله هانزل المقدمة عن الدورة وليه انا عاملها اصلا ان شاء الله مع سير الدروس وميعاد بدء الدورة دلوقتى حالا

Galileo · #5 (**permalink**) 14-06-2008, 03:15 PM

مقدمة

انتشرت فى الفترة الاخيرة على الانترنت دروس البرمجة بانواعها ولكنها للاسف – حسب ما قرأته – ليست على المستوى العلمى المطلوب ولا تؤدى سوى الى افكار بسيطة لا تؤدى الى انجازات جبارة وذلك لأنه من الواضح ان الباحث عن "علم البرمجة" يريد ان يصبح مبرمجا بين يوم وليلة وهو ما لن يتحقق لأن البرمجة ليست فقط سطور نكتبها ، بل هى علم وطريقة تفكير .. وأكبر المبرمجين فى العالم واكثرهم شهرة لا يعلم جميع اسرار البرمجة لأن البرمجة بها العديد والعديد من الاشياء والدلالات التى لا يمكن لانسان تقريبا ان يحصيها كلها ببساطة لأن اللغات تتطور يوميا ، ونجد ايضا صاحب الدروس يسعى لمنصب فى هذا الموقع او ذاك فيقوم بذكر مصطلحات رنانة ليثبت للاخرين ولنفسه انه "جامد اوى" بحثا عن مصلحة شخصية فى غير العلم [طبعا الكلام مش على كل الدروس .. على بعض منها فقط].

لذلك ، قررت البدء فى هذه الدروس والتى باذن الله ستسير على منهج علمى .. قد يكون بطيئا نوعا ما ولكنه فى النهاية يصل بصاحبه الى المستوى العلمى المراد والذى سيفيده ان شاء الله ويساعده ويضعه على الطريق الصحيح لعلم البرمجة الواسع.

وللعلم ، سيكون عليك كقارئ للدروس الا تحاول جمعها وقراءاتها واستيعابها كلها فى يوم واحد .. فهذا سيقلل فرصك فى التعلم الى 50% فقط وهو ما لا تريده بالطبع .. فهذه الدروس تدرس فى الجامعات على شهور قد تصل الى السنة الواحدة لكل 10 او 15 درس.

الاحتياجات

[بالنسبة للجزء الاول]
فى هذه الدروس ان شاء الله سنعتمد اولا على طريقة التفكير .. لذلك لن تحتاج الى برامج او غيره سوى الnotepad المتوفرة بالويندوز او اذا اردت "تدليع" نفسك من الممكن استخدام الMicrosoft Word .
أيضا معرفة اللغة الانجليزية تعتبر مطلب ضرورى وان كنت سأحاول ان ابسط الموضوع الى مجرد كلمات بالانجليزية.

[بالنسبة للجزء الثانى]
ثم بعد ذلك سنقوم بالتطبيق فعليا على ما تعلمناه باستخدام لغة الجافا Java فى البرمجة لذلك سنحتاج برنامج
JCreator LE v3.5 وهذه النسخة بالذات! للمحترفين او اللى عندهم فكرة ، ده الCompiler بتاعنا ان شاء الله.

كما سنحتاج الJDK

ويمكنك تنزيل الJDK من هذا الرابط

والبرنامج JCreator LE v3.5 مجانى ويمكنك تنزيله من هنا :
http://www.jcreator.com/download.htm

Khalid4Ever · #6 (**permalink**) 14-06-2008, 03:56 PM

تسلم يديك اخي جلال ..
واصل شرحك اخي و ان شاء الله نتابع معك ..
وفقك الله

Galileo · #7 (**permalink**) 14-06-2008, 04:28 PM

كيفية سير الدروس

باذن الله سنبدأ فى سير الدروس كالتالى :

أولا

سنتعرف سويا على الAlgorithm .. ما هو الAlgorithm؟ وما هى استخداماته ولماذا نتعلمه؟

سنبدأ فى التعرف على الخصائص البرمجية العديدة فى الAlgorithm والبدء فى عمل برامج باستخدامه

وسيكون مجمل هذه الدروس 9 دروس ان شاء الله مصممة كالتالى

1- الدرس الاول : التعرف على الAlgorithm .. التعريف والخصائص والاستخدام

2- الدرس الثانى : المتغيرات Variables

3- الدرس الثالث : انواع المعلومات Data Types

4- الدرس الرابع : التعرف على انواع البرامج Sequential, Conditional and Iterative

5- الدرس الخامس : كتابة الAlgorithm والبدء فى كتابة الSequential Algorithms

6- الدرس السادس : كتابة الConditional Algorithms

7- الدرس السابع : كتابة الIterative Algorithms

8- الدرس الثامن : كيفية اخذ Inputs من المستخدم والعمل عليها

9- الدرس التاسع : الLists and the Arrays

ثانيا

سنبدأ فى تطبيق ما تعلمناه فى الAlgorithms على لغة برمجية حقيقة لنرى نتيجة عملنا وستكون اللغة هى "الجافا" ..

وسيكون مجمل هذه الدروس 10 دروس حيث سنتعمق قليلا فى هذه اللغة .. وفى هذه المرحلة سنستخدم برنامج لنقوم باختبار ما نكتبه ..

الدروس مصممة كالتالى

1- الدرس الاول : ما هى الجافا والفرق بينها وبين الجافا سكريبت

2- الدرس الثانى : البدء فى كتابة برامج بالجافا Sequential Java Programs

3- الدرس الثالث : كتابة Conditional Java Programs

4- الدرس الرابع : كتابة Iterative Java Programs "الجزء الاول"

5- الدرس الخامس : كتابة Iterative Java Programs "الجزء الثانى"

6- الدرس السادس : اخذ Input من المستخدم والعمل عليه

7- الدرس السابع : Arrays

8- الدرس الثامن : Arrays "الجزء الثانى"

9- الدرس التاسع : Methods

10- الدرس العاشر : Recursive Methods

ثالثا

على كل درس باذن الله ابتداءا من الدرس الخامس فى الجزء الاول ان شاء الله "Algorithms" سأقوم بطرح أسئلة للتمرين ومن سيقوم بحلها سيكون قادرا على تقييم نفسه وسيكون أقدر على فهم بقية الدروس ان شاء الله لأن التمرين اهم حاجة فى البرمجة لأن عموما افضل طريقة فى تعلم البرمجة هى Trial and Error

هذه الاسئلة ستكون اختيارية ولكن من سيقوم بحلها سيكون له الاولوية فيما بعد فى طرح الاسئلة وطلب اعادة شرح اجزاء معينة يريدها من الدروس ان شاء الله.

ملحوظة
كما اوضحت باول الموضوع ان شاء الله لن أبدأ الدروس قبل السادس والعشرين من يونيو الحالى ان شاء الله لظروف الامتحانات.

طبعا دى الخطة الاولية للدروس ممكن عدد الدروس يزيد او يقل على حسب استجابة الاعضاء ان شاء الله.

بالتوفيق

Hussam_Steel · #8 (**permalink**) 20-06-2008, 04:00 AM

بارك الله فيك اخي الكريم .......................تابع و نحن معك ان شاء المولى

Galileo · #9 (**permalink**) 26-06-2008, 02:57 PM

الدرس الاول :

ما هى الAlgorithms؟ ولماذا نستخدمها فى هذه الدروس؟

التعريف العلمى للAlgorithm هو :

“A step-by-step problem-solving procedure, especially an established, recursive computational procedure for solving a problem in a finite number of steps.”

والتعريف ببساطة يقول ان الAlgorithm هو طريقة لحل مشكلة قد تقابلنا عن طريق خطوات محددة لحل هذه المشكلة فى وقت محدد ومعروف.

يعنى ايه؟
يعنى مثلا احنا عندنا طائرة نريد ان نعرف هتوصل مصر بعد اد ايه ؟!
اكيد فى الاول عايزين نعرف الطائرة دى ماشية بسرعة كام .. والمسافة ما بين هى فين دلوقتى ومصر كام كيلو .. ولما هنعرف المعلومتين دول بمنتهى البساطة هنعرف نحسب الوقت المتبقى على وصول الطائرة دى لمصر.

فهيقولك مثلا الطائرة ماشية على سرعة 88 كيلو فى الساعة والمسافة حوالى 120 كيلومتر

يبقى احنا دلوقتى كان عندنا مشكلة .. ان عايزين نعرف الطائرة هتوصل مصر فى كام ساعة

وبعدين حلينا المشكلة دى فى 4 خطوات

الاولى : حددنا احنا عايزين ايه عشان نحل المشكلة [السرعة والمسافة]
التانية : عرفنا ماشية بسرعة كام
التالتة : عرفنا المسافة ما بين مصر ومكان الطيارة دلوقتى
الرابعة : حسبنا الوقت المتبقى

طيب .. مثال تانى .. معظمنا بيشتغل او بيدرس .. طيب اما نصحى من النوم الصبح .. اول حاجة بنعملها ، نغسل وجهنا ونتوضأ ونصلى الفجر ، نقوم باحضار الجريدة مثلا ثم تحضير الافطار فالاكل والنزول الى الشغل.

اهو نظام الحياة ده يعتبر فى حد ذاته Algorithm .. طب ازاى؟

فوق فى نظام الحياة ده اللى عايزين نوصله "بدل ما هنقول مشكلة هنقول اللى عايزين نوصله" هو اننا نجهز عشان ننزل الشغل او الجامعة او المدرسة .. الخ

وعرفنا احنا هنوصل لهدفنا ده .. ازاى .. عن طريق خطوات بنعملها ..

الاولى : هنقوم من السرير
التانية : هنروح الحمام
التالتة : نغسل وشنا ونتوضأ
الرابعة : نصلى الفجر
الخامسة : نروح نجيب الجورنال من على باب الشقة
السادسة : نحضر الافطار
السابعة : نأكل
الثامنة : ننزل بقى

اهو هو ده بالضبط الAlgorithm .. عندنا مشكلة عايزين نحلها او هدف عايزين نوصله .. الalgorithm بقى هو بالضبط الخطوات اللى هتحللنا المشكلة دى او توصلنا للهدف اللى احنا عايزينه ده.

مثال تالت .. جالك طفل قالك لو سمحت يا عمو ممكن تجمعلى الرقمين دول؟ وقالك خمسة وستة ..

طبعا المخ عندك هيجبها 11 فى جزء من الثانية وتروح قايلهاله .. طب عايزين بقى نقلبها لمشكلة وخطوات للحل ..

ازاى؟

المشكلة : جمع رقمين

خطوات الحل ..

الخطوة الاولى : ناخد من الواد اول رقم
الخطوة الثانية : ناخد من الواد تانى رقم
الخطوة التالتة : ملناش دعوة بالواد وهنعمل الرقم الاولانى + الرقم التانى
الخطوة الرابعة : نقول للواد النتيجة

طيب .. دلوقتى ليه كل حاجة احنا بنقلبها خطوات؟

لأن ببساطة الكمبيوتر عبارة عن الة غبية صنعها الانسان عشان تنجز شوية فى عمله لراحة الانسان .. والالة علشان غبية لازم نديلها الخطوات اللى احنا عايزينها بالضبط وهى هتنفذها .. يعنى مثلا عندك الالة الحاسبة .. هل هتبوصلها كده وتقولها خمسة فى ستة بكام هتلاقيها كتبت 30؟ لأ طبعا .. لازم تدوس على الرقم 5 وبعدين تدوس على × وبعدين تدوس على ال6 وتدوس = هتديك ال30 فى الاخر .. خطوة خطوة!

الخطوات دى هى الAlgorithm!

نرجع بقى للتعريف

" الAlgorithm هو طريقة لحل مشكلة قد تقابلنا عن طريق خطوات محددة لحل هذه المشكلة فى وقت محدد ومعروف."

اظن التعريف بقى واضح وليه خطوات بقت واضحة ان شاء الله يا رب.

طبعا زى مانت متوقع ، أكيد الalgorithm مش حاجة سهلة كده والا ماكانش زمانى عاملها 9 دروس J

الفكرة بقى فى الalgorithm وان احنا لازم نتعلمه قبل ما ندخل فى اى لغة برمجية اخرى سهلة جدا ، ليه؟
لأن الAlgorithm اساسا هو لغة برمجة فى حد ذاته .. ليه تقريبا كل مواصفات لغات البرمجة التانية .. يعنى مثلا لازم يتكتب بطريقة معينة وبيستخدم طرق وكلمات محددة ومعروفة زى اى لغة برمجة .. لكن الفرق ان الكمبيوتر مش هيفهمها .. ليه؟

لأن الAlgorithm اصلا مصمم للانسان .. بيتكتب باللغة الانجليزية عشان الانسان يفهمها ويقدر يعرف اللى هيوصله فى الاخر .. طب ليه بنتعلمه؟!

بنتعلم الAlgorithm لأن مجرد ما هنفهمه وندرسه صح فى الاخر ستصبح اى لغة اخرى "فى جيبك" لأن الAlgorithm هو مفهوم لغات البرمجة .. اول ما هنتعلم الAlgorithm ، هتلاقى انك فى لغات البرمجة بعد كده مجرد بتشيل كلمة وتحط واحدة تانية وكده يبقى انت اتعلمت لغة جديدة .. وهنشوف ده فى الجافا ان شاء الله.

وكده ، دى نهاية الدرس الاول .. أرجو ان يكون الجميع قد استوعب ما هو الAlgorithm ولماذا نستخدمه ..

استودعكم الله

[من لديه سؤال فليتفضل بطرحه ، الدرس الثانى سيتم طرحه خلال يومين ان شاء الله]

أبو سلم · #10 (**permalink**) 28-06-2008, 01:28 AM

شكرا جزيلا على الجهد الذي تبذله
واعذرني لأني أتيت متأخرا (بسبب الامتحانات)

ولدي سؤال عن الدورة بشكل عام:
هل بإمكاني استخدام JBuilder2007 الموجود عندي في هذه الدورة أم يجب أن أنزل البرنامج المحدد؟

وشكرا مرة أخرى

Mr.MaX · #11 (**permalink**) 28-06-2008, 02:26 PM

ياعيني عليكـ ياستاذ جاليلو ..

انا حكون معكـ متابع بشكل دائم بإذن الله لأنه الترم اللي فات واللي قبله درست البيسكـ والأدفانس جاافا وانا من عشاق الجافا ..

ياريت ماتتأخر علينا بالدروس حتى ماينام الموضوع وينتسى ..

موفق اخوي ..

( اهم الشي التطبيق ع الدروس لأنه بدون التطبيق مالها داعي الدورهـ .. )

Galileo · #12 (**permalink**) 28-06-2008, 08:38 PM

إقتباس:

المشاركة الأصلية بواسطة أبو سلم

شكرا جزيلا على الجهد الذي تبذله
واعذرني لأني أتيت متأخرا (بسبب الامتحانات)

ولدي سؤال عن الدورة بشكل عام:
هل بإمكاني استخدام JBuilder2007 الموجود عندي في هذه الدورة أم يجب أن أنزل البرنامج المحدد؟

وشكرا مرة أخرى

يمكنك استخدام اى Compiler بتحبه طبعا بس انا لا اتعامل الا مع الJCreator فأى اسئلة فى برامج تانية ممكن معرفش ارد رد مفيد :)

إقتباس:

المشاركة الأصلية بواسطة Mr.MaX

ياعيني عليكـ ياستاذ جاليلو ..

انا حكون معكـ متابع بشكل دائم بإذن الله لأنه الترم اللي فات واللي قبله درست البيسكـ والأدفانس جاافا وانا من عشاق الجافا ..

ياريت ماتتأخر علينا بالدروس حتى ماينام الموضوع وينتسى ..

موفق اخوي ..

( اهم الشي التطبيق ع الدروس لأنه بدون التطبيق مالها داعي الدورهـ .. )

ان شاء الله اول ما هنبدأ نكتب الalgorithm ولما ندخل فى الجافا ونبتدى نكتب الcode بتاعنا هنطبق كتير اوى ان شاء الله :)

باذن الله الدرس الثانى بكرة بالليل ان شاء الله
(الاحد 29 يونيو 2008)

SLIM SHADY · #13 (**permalink**) 29-06-2008, 11:52 AM

ان شا الله نتابع معك اخي جلال
بانتظار باقي الدروس

تحياتي

osamadaf · #14 (**permalink**) 29-06-2008, 12:49 PM

نحن معك ومتابعين وفي إنتظار الدرس علماً بأن اليوم هو الأحد
وفقك الله

Galileo · #15 (**permalink**) 29-06-2008, 08:34 PM

الدرس الثانى :

Variables

الvariables باللغة العربية معناها المتغيرات (حاجة مش ثابتة) .. بالنسبة للكمبيوتر معناها مكان فى الميمورى. طيب نوضح اكتر.

فى مسألة رياضة .. يقولك ايه .. احسب س اذا كانت س = ب + ت .. فى الاحوال الاتية :

ب=4 ، ت=4
ب=5 ، ت=2

نلاحظ هنا ان فى الحالة الاولى ، س هتبقى ب8 .. وفى الحالة التانية س هتبقى ب7 ..
يبقى كده س مش ثابتة .. بتتغير .. ممكن نغيرها .. وكذلك الحال بالنسبة لل"ب" ولل"ت" .. مش ثابتين ..

يعنى ال"س" وال"ب" وال"ت" عبارة عن متغيرات .. ملهمش دلالة ثابتة .. بتتغير كل شوية .. طيب ايه لزمة ده؟!
هقولك!

دلوقتى انت بتعمل برنامج هيجمع رقمين .. الرقمين دول انت متعرفهمش .. زى بالضبط الواد اللى فى الدرس الاولانى اما جه قالك يا عمو احسبلى خمسة + ستة بكام .. اقف معايا كده وتعالى نفكر .. لو الواد كان جه قال اجمعلى الرقمين دول كده يا عمو وسكت!! طيب دلوقتى هو مداكش الرقمين .. هتجمع انت ايه؟ ولا حاجة!
جه قالك الخمسة والستة فقلتله ال11 .. جه بعد كده واحد تانى قالك اجمعلى 4 و 9 .. يعنى كل واحد عايز يجمع رقمين مختلفين من عنده .. يعنى لما نيجى نعمل برنامج .. لازم نعمله على انه ياخد الرقمين وبعدين يجمعهم .. طيب .. ايه علاقة ده بالمتغيرات؟!

هنا بقى لزمة المتغيرات .. ان احنا فى معظم البرامج اللى هنكتبها ان شاء الله هنفترض واحنا بنكتب ان الرقم الاولانى ده عبارة عن x .. والرقم التانى عبارة عن y (لأن احنا منعرفش الرقمين اللى المستخدم عايزهم يتجمعوا) .. وبعدين هتبقى العملية الحسابية بتاعتنا x + y .. يبقى كأننا فى مسألة رياضة .. لو اليوزر قال الx ب6 والy ب2 يبقى الناتج بتاع البرنامج بتاعنا 8 ان شاء الله ولو قال اى رقمين تنين هنجمعهم .. لأن احنا لو عملنا برنامج وكتبنا الارقام من عندنا يبقى ايه لزمته ؟! يعنى لو عملنا برنامج شغلته انه بيجمع 5 و 2 .. يبقى الناس هتعمل بيه ايه؟ ولا حاجة!!

المهم .. المتغيرات دى ممكن يبقى ليها اى اسم .. ممكن بدل الx تبقى firstnumber او بدل الy تبقى secondnumber .. والاسامى دى براحتك خالص وانت بتختار الاسم ممكن تكتب اسمك مثلا .. Mohamed .. لكن فى شوية حاجات لازم ناخد بالنا منها .. زى ايه؟

1- اسم المتغير لازم يبدأ بحرف .. ويجوز استخدام الحروف والارقام والعلامة _ فقط.
2- فى المستقبل ان شاء الله فى الجافا ، يجب الا يتعارض اسم المتغير مع اى كلمة متحددة قبل كده فى الجافا ودى هتوضح فى المستقبل ان شاء الله

طيب دلوقتى قلنا ان اسامى المتغير براحتنا .. نسمى الاسامى اللى احنا عايزينها بس عادة الناس بتسمى المتغيرات بتاعتها وهى بتبرمج باسامى ليها علاقة بالبرنامج زى مثلا بدل x تبقى firstnumber ومعناها الرقم الاولانى لو كنا بنجمع رقمين مثلا .. عشان فى برنامج كبير واحنا بنكتبه منتلخبطش ونقول طب احنا استخدمنا الاسم ده قبل كده ولو استخدمناه تانى هيتأثر علي الكود بتاعنا تانى ولا لأ.

المتغيرات زى ما اتفقنا فوق هى بالنسبة للكمبيوتر مكان فى الميمورى ..

لما نكتب مثلا x=5 .. بيبقى فى مكان فى الميمورى اتعمل خاص بالمتغير x ومحفوظ جواه الرقم 5.
جينا بعد كده كتبنا x=x+1 .. معناها ان احنا هناخد الرقم x القديم اللى هو 5 .. نزود عليه واحد يبقى 6 .. ونحفظ الرقم الجديد فى نفس اسم المتغير اللى هو x .. يبقى عندنا المتغير بتاعنا دلوقتى المكان بتاعه فى الميمورى موجود فى الرقم 6 .. مش 5. لأن زى ما احنا متفقين انها متسمية متغيرات عشان بتتغير .. كأننا شطبنا على الرقم القديم وكتبنا رقم جديد زى ما متوضح فى الصورة

طيب .. ايه طرق التغيير؟!

ممكن لو عندنا x=5 .. ممكن نعدل عليها على سبيل المثال لا الحصر بالطرق الاتية

1) x=x*x .. وهنا النجمة بتبقى هى علامة الضرب ولن نستخدم علامة الضرب الاصلية "الx" .. يبقى كده 5*5 = 25 .. يبقى الx الجديدة عندنا الرقم المحفوظ فيها 25
2) x=x+3 .. زى ما مشروح فوق ، هناخد الرقم اللى فى الx .. نزود عليه 3 ونحفظه فى الx
3) x=6 .. كده احنا غيرنا على طول من غير اى عمليات حسابية .. يبقى كده الرقم الجديد ب6
4) x=x/5 .. العلامة دى هى القسمة .. ولن نستخدم ال÷ .. سنستخدم ال/ .. وهنا الرقم الجديد المحفوظ فى الx هى 5 مقسومة على 5 تبقى بواحد

والكثير اللى هايقبلنا ان شاء الله فى الدروس المقبلة ..

وطبعا ممكن نساوى متغير باخر .. يعنى لو الx=5 .. والy=8 .. وكتبنا x=y .. هناخد الرقم 8 ده ونحفظه فى الx دون المساس بالمتغير y .. هيفضل زى ما هو! ويبقى كده الx=8.

طيب ليه الy متساوتش هى بالx ..؟

عشان الكود بنقراه من الشمال .. يعنى x=y .. هتتقرى : المتغير x هنساويه بالمتغير y وليس العكس :)

أرجو استيعاب هذا الدرس والتعليمات الخاصة بالمتغيرات هنا لأن ان شاء الله الدرس اللى جاى Data Types مهم جدا جدا ويعتمد بشكل اساسى على هذا الدرس.

دى كده نهاية الدرس الثانى .. أى اسئلة انا حاضر ان شاء الله

خيارات الموضوع
عرض نسخة للطّباعة ارسل هذه الصفحة لصديق
طريقة العرض
النمط الخطي التحويل إلى النمط الشجري التحويل إلى النمط المتطوّر

مواضيع مشابهة
الموضوع	كاتب الموضوع	المنتدى	الردود	آخر مشاركة
تعلم الجافا فى 21 يوم	mostafaserag	كورســــــــات بوابة داماس والبرمجة	8	12-05-2007 11:36 PM
هل من الممكن حذف الجافا في وندوز اكس بي	اكبري	صيانة الحاسوب و تبادل الخبرات وحلول الحاسب الألي	2	12-07-2005 10:56 PM
كيف أدخل على شات الجافا	ksa2002	صيانة الحاسوب و تبادل الخبرات وحلول الحاسب الألي	2	27-09-2004 07:50 AM
دعم الجافا ابليت في موزيلا ؟؟	MutantX	لينكس - يونكس - ريدهات - فيدورا - توزيعات	3	10-01-2004 05:11 PM
الاكس بي لايدعم الجافا	أســامــة	صيانة الحاسوب و تبادل الخبرات وحلول الحاسب الألي	3	22-05-2003 02:26 AM

عدد الأعضاء الذي يتصفحون هذا الموضوع : 1 (0 عضو و 1 ضيف)

دورة فى الجافا؟!

كورســــــــات بوابة داماس والبرمجة